Dili lang trabaho ang prayoridad karon sa kapitolyo. Gipalig-on usab sa probinsya ang paningkamot nga mahimong mas himsog, malipayon, ug produktibo pinaagi sa Health Promotion Framework Strategy ug Healthy Workplace FITools Workshop nga gipahigayon sa VIP clubhouse, DNSTC, Mankilam, Tagum City, Agosto 5-6, 2025.

Pinaagi sa inisyatibo sa Provincial Health Office (PHO) ug sa Provincial Human Resource and Management Office, uban sa suporta sa Department of Health, gitapok sa maong kalihokan ang mga Occupational Safety and Health Standard (OSH) officers sa matag departamento sa kapitolyo aron tutokan ang pagduso sa mga palisiya ug praktis nga mosangpot sa mas himsog nga workplace environment.

Sumala ni Health Education and Promotion Officer III Yasmin Mandangan sa DOH Region XI, usa sa mga resource speakers, ang programa kabahin sa Health Promotion Framework Strategy sa DOH — usa ka 10-year “roadmap” ilawom sa Universal Health Care law nga nagtudlo sa mga LGUs ug uban pang sektor sa pag-angkla sa ilang mga health initiatives.

“We’re here to discuss the healthy workplace initiative for our LGUs. Ang pag-implement niini subay kini sa implementation sa atong Universal Health Care. Usa sa mandato sa Department of Health is to scale up the health promotion interventions. To further substantiate ani nga mandate from UHC, nagpagawas si DOH og Health Promotion Framework Strategy. It’s a 10-year roadmap, mao ni siya ang sundan nato para ang atong mga LGUs, pati na atong mga other stakeholders, diri pud nila i-anchor ilang health initiatives,” sulti niya.

Lakip sa gipasabot sa workshop ang kaimportante sa pagpatuman sa mga health-enabling policies ug supportive environment dili lang sa komunidad ug eskwelahan, apan labaw sa tanan sa trabahoan. Giila usab nga ang himsog nga empleyado mas makahatag og kalidad nga serbisyo sa publiko.

“We’re giving technical assistance to the province of Davao del Norte. We really appreciate the effort nga i-implement nila ‘ning healthy workplace diri sa ilang kapitolyo sa ilang mga empleyado… Thus, nag-conduct ta karon og workshop to make sure makita nato unsa na ka close ang pag-implement sa probinsya sa Davao del Norte in achieving the healthy workplace certification. If naa tay makita nga mga gap in their implementation, mao na atong himoan og plano karon,” ingon ni Mandangan.

Gitudlo usab ang paggamit sa FITools — usa ka toolkit nga makatabang sa pag-assess sa kahimtang sa trabahoan ug sa pagplano sa mga inisyatibo nga mohaum sa tinuod nga panginahanglan sa mga empleyado.

“When we talk of healthy workplace, we anchor it in the health promotion framework strategy kung asa duna kitay ginatan-aw nga 7 priority areas. Kini mao ang diet and physical activity, environmental health, immunization, sexual and reproductive health, violence and injury prevention, mental health ug substance use,” matud ni Mandangan.

Sa tibuok rehiyon XI, giila ang Davao del Norte nga usa sa mga probinsya nga pinakadaghan og LGU nga nagpadayag og interes sa pagpatuman sa healthy workplace program.

“Ang probinsya sa Davao del Norte ang usa sa mga provinces sa tibuok region nato nga pinakadaghan na ang LGU nga naghatag og intent to implement the healthy workplace program,” dugang niya.

Ang workshop kabahin sa padayong tinguha sa administrasyong Jubahib aron matuman ang tumong sa UHC — nga ang tibuok komunidad, lakip ang mga trabahoan sa gobyerno, mahimong mas aktibo ug mas responsible sa pag-atiman ug pagsiguro sa kahimsog.

Writer: Jun Rey Villanueva
Photos: Andrew John Hababag