Gisiguro sa Davao del Norte Learning Institute (DNLI) nga mapuslan ug dili usikan sa mga kwalipikadong aplikante ang oportunidad sa pagsalmot sa ilang gitanyag nga mga graduate programs, nga gisuportahan sa Provincial Government ubos sa administrasyon ni Governor Edwin I. Jubahib.
Sa tumong nga matabangan ang edukasyon ug propesyonal nga pagtubo sa mga kawani sa gobyerno ug ubang aplikante, gipahigayon ang hugot ug makuting interbyu niadtong Mayo 15, 16, ug 19, 2025 sa Bulwagan ng Karunungan sa Provincial Government Center, Mankilam, Tagum City.
Ang interbyu ug assessment gidumalahan ni Supervising Administrative Officer Samuelle Marionne Sanchez, uban sa mga staff sa DNLI. Gisukod niini ang determinasyon ug kwalipikasyon sa mga aplikante nga mosalmot sa tulo ka graduate programs: Master in Information Technology (MIT), Master of Arts in Educational Management (MAEM), ug Master in Public Affairs (MPAF).
Gisaysay ni Sanchez nga adunay dako nga subsidiya ang probinsya alang sa mga empleyado nga moapil sa maong programa. Ang mga kawani sa provincial government makadawat og hangtod 75% subsidy sa ilang tuition ug uban pang bayranan, samtang ang mga aplikante gikan sa national government agencies (NGAs), local government units (LGUs), ug government-owned and controlled corporations (GOCCs) makadawat og 37.5% nga suporta, katunga sa natakdang subsidiya.
“Kini nga tabang moabot isip sponsorship sa ilang tuition, kasagaran bayaran sa kataposang bahin sa semestre basta ipakita ang grado sa niaging semestre,” pasabot ni Sanchez.
Gisiguro usab sa DNLI nga andam kini sa paghatag og suporta sa mga estudyante, lakip na ang lugar para sa klase, mga koneksyon ug partnership alang sa research, access sa data ug facilities, ug mga rekomendasyon kung kinahanglan sa ilang academic requirements.
Si DNLI Executive Director Dr. Mervin Jay Suaybaguio, nga mao usab ang kasamtangang Provincial Information Officer, nanguna sa inisyatiba uban sa pakigpartner sa Davao del Norte State College (DNSC). Ang programa kabahin sa paningkamot sa probinsya nga mapalambo pa ang serbisyo publiko pinaagi sa dekalidad nga edukasyon sa mga empleyado.
“I-consider nila ang DNLI isip usa ka professional development avenue. Ang atong pagpanerbisyo sa publiko angay sab tugbangan sa maayong edukasyon ug kasinatian,” ingon ni Sanchez.
Writer: Lorna Tripoli
