Gimandoan ni Davao del Norte Governor Edwin "Kuya Gov" Jubahib ang Technical Working Group (TWG) nga palig-onon ug palapdan pa ang KAAGAPAY Program (Kawsa sa Agrikultura ug Panginabuhian sa Barangay). Kini nga kamandoan gikumpirma ni TWG Coordinator Alphabet Gulanes atol sa regular nga miting sa TWG nga gipahitabo sa Tree Park, Mankilam, Tagum City, Agosto 5, 2025.
Sumala ni Gulanes, ang Expanded KAAGAPAY mao na karon ang prayoridad nga direktiba sa gobernador, nga naglangkob sa modernong mga pamaagi sa pagpananom sama sa humayan ug maisan. Ang maong kabag-ohan giapil na sa programa ug gipondohan kini og P10 milyon alang sa rice buying program.
Gipahibalo usab nga sukad sa paglunsad sa programa niadtong tuig 2020, aduna na kini 795 ka aktibong People's Organizations (POs) sa tibuok probinsya. Uban sa pagdumala ni Kuya Gov ug Vice Governor Clarice, ang programa gilauman nga mas molapad pa ang pagtabang ngadto sa mga gustong manginabuhi.
Lakip sa mga kalihokan sa Expanded KAAGAPAY mao ang pag-apil sa mga gustong magtukod og sari-sari store ubos sa Sustainable Livelihood Program. Tanan nga porma sa panginabuhian nga makabenepisyo ang mga katawhan ipailalom na sa programa.
Giklaro usab nga ang pondo nga gigahin sa probinsya alang sa KAAGAPAY gidoble gikan sa P23 milyones ngadto sa P50 milyones karong tuiga. Apil sa gipalapad nga inisyatibo mao ang pagdugang og mga KAAGAPAY field officers sa matag LGU aron mas epektibo ang koordinasyon uban sa mga barangay workers. Busa karon, nadugangan pa og 213 ka mga startup POs, hinungdan nga milapas na sa usa ka libo ang total nga mga organisasyon nga benepisyaryo sa programa.
Sa laing bahin, gipaningkamotan sa TWG nga mapasayon ang sunod-sunod nga dispersal sa free-range chicken alang sa mga POs nga wala pa nakadawat niini tungod sa kakulang sa pondo sa miaging tuig. Gikatakda ang dispersal sa mga manok sa lungsod sa Asuncion ug Panabo City karong Agosto 7 ug 8.
Padayon usab ang buyback operations sa mga ani sa uma ug produkto sa kamanokan gikan sa mga benepisyaryo sa KAAGAPAY. Gimonitor pag-ayo ang income sa mga POs aron masiguro nga magpadayon ang kita ug malikayan ang pagkawala sa puhunan sa probinsya.
Writer: Lorna Tripoli
