Niarangkada ang "Adopt a forest" environmental program sa Bureau of Fire Protection sa Rehiyon XI niadtong Hulyo 17, 2025, pinaagi sa panaghiusa sa mga fire marshals sa Davao del Norte ug Tagum City.
Gipangunahan nila FCInsp Janeth Mapesos Lequigan, ang Provincial Fire Marshal, ug FSInsp Esequil Tabon sa Tagum City Fire Station ang pagtanum sa kapin 300 ka mangrove trees duol sa Hijo Banana Beach, sa Barangay Madaum, Tagum City.
Apil sa kalihokan ang mga representante gikan sa Provincial Environment and Natural Resources Office (PENRO) ug Hijo Resources Corporation, nga nahimong partner sa programa pinaagi sa pagpaambit og usa ka ektaryang luna alang sa tanuman.
Sumala ni Lequigan, kini nga kalihokan kabahin sa mas lapad nga urban greening project ni Fire Chief Superintendent Jonito Maslang, Regional Director sa BFP Region XI. Gibutyag niyang wala lang ‘ni gihimo sa Davao del Norte, kondili apil ang tibuok rehiyon.
“Usa ‘ni ka adbokasiya sa atong regional director… dili lang kami sa Davao del Norte kundi tibuok Rehiyon XI,” pasabot ni Lequigan.
Dugang usab ni Lequigan nga ang BFP nag-awhag sa publiko nga makigbahin sa mga kalihokan nga nagatabang sa pagpanalipod sa kinaiyahan, dili lang kini obligasyon sa mga uniformed personnel, kondili sa tanang katawhan.
“Kami pud nag-awhag sa katawhan nga unta dili lang kami mga uniformed personnel ang mo-accept ingon aning hagit kundili tanan ‘ta kay kita, isip stewards dinhi sa kalibutan, tanan man ta makabenepisyo ani,” iyang pahimangno.
Ang Hijo Resources Corporation pinaagi ni Trinity Project Supervisor Gabriel Sapico mapasalamaton sa BFP ug sa mga ahensya sa panggamhanan nga ang Hijo maoy napiling private partner.
“So, ilang plan is help us to rehabilitate sa atong mangrove area sa forest, ug sa Hijo river sa amoang area of operations sa Trinity, diri sa Hijo sa Madaum... So, we are very thankful sa BFP also sa DENR pud, among long-time partner diri sa Hijo,” matod ni Sapico.
Gipalig-on pa sa kalihokan ang panaghiusa pinaagi sa pirmahanay sa “Pledge of Commitment” sa mga fire marshals ug national government agencies, nga nagsaad sa ilang suporta sa programa sa pagpanalipod sa kinaiyahan.
Ang "Adopt a Forest" usa ka long-term program nga maglangkob sa daghang aktibidad sama sa tree planting, rejuvenation, fire training management, ug uban pang mga kalihokan nga ipatuman sa sunod nga mga buwan.
Writer: Lorna TripoliPhotographer: Andrew Hababag
