Gipakusgan sa Probinsyal nga Panggamhanan sa Davao del Norte ang kahimtang sa kaluwasan ug kaandam sa mga katawhan batok sa kalamidad, pinaagi sa usa ka orientation ug simulation drill nga gipahigayon sa Barangay Pag-asa, Kapalong, niadtong Hulyo 11, 2025.
Ang aktibidad kabahin sa selebrasyon sa National Disaster Resilience Month nga gipasiugdahan sa Provincial Disaster Risk Reduction and Management Office (PDRRMO) ug sa Provincial Social Welfare and Development Office (PSWDO). Gitutokan niini ang Camp Coordination and Camp Management (CCCM) ug ang Family Evacuation Preparedness Drill, diin aktibong mipartisipar ang mga residente sa Purok 9.
Lakip sa simulation exercises ang mga managlahing senaryo sama sa pagkawala sa bata atol sa baha, mga evacuees nga nakuyapan, kakuwang sa suplay sa pagkaon, ug uban pang mga problema sagad sulod sa evacuation camp. Gihisgutan usab sa oryentasyon ang saktong pagpahiluna sa mga inahan nga nagpasuso, mga katigulangan, ug Persons with Disabilities (PWDs).
Matud ni Lanie Guinit, Assistant Head sa PSWDO, nga ang kalihokan suportado sa Provincial Government ubos sa liderato ni Governor Edwin I. Jubahib aron masiguro nga andam ang mga barangay ug munisipyo sa pagdumala sa mga evacuation centers.
“Kini gyud ang pinakatumong, nga maplastar ang evacuation centers ug ang sistema sa pagdumala sa mga evacuees panahon sa kalamidad,” matod ni Guinit.
Gipasabot usab niya nga ang sistematikong koordinasyon tali sa mga camp managers ug lokal nga ahensiya ug LGUs sama sa MSWDO ug MDRRMO, importante kaayo aron mahatagan og tukma ug igong tabang ang mga internally displaced persons (IDPs).
“Ang ilang report maoy basihan kung duna bay ipanghatag nga food ug non-food assistance sa mga evacuees,” dugang ni Guinit.
Sa pagtapos sa kalihokan, gitunolan ang mga partisipante og relief food packages gikan sa buhatan ni Governor Jubahib.
Writer: Lorna TripoliPhotographer: Andrew Hababag
