“Ulan ka lang, graduate na mi!”
Mao 'ni ang singgit sa 1,571 ka estudyante sa Davao del Norte State College (DNSC) nga nipaso sa ilang graduation karong tuiga, bisan pa sa galagiting kainit ug kalit nga pagbunok sa ulan atol sa seremonya didto sa ilang sports complex sa Panabo City.
Sa kinatibuk-ang ihap sa mga graduates sa DNSC Batch 2024-2025, 1,529 niini undergraduate, 13 sa doctoral, ug 29 sa masteral level.
Nahimong keynote speaker sa ceremony si Civil Service Commission Regional Director Cyril-Nathan SM. Eamiguel nga nagdasig sa mga gradweyts nga dili lang maninguha sa kalampusan para sa ilang kaugalingon, kundi mahimong instrumento sa kabag-ohan sa komunidad ug sa nasud. Gibutyag usab niya nga ang kaugmaon dili pre-destined—sila mismo ang nagahulma niini matag-adlaw pinaagi sa ilang mga desisyon ug aksyon.
“The future is unwritten. You are the pen... So be bold, be kind, relentless in the pursuit of better world. Inspire change, create futures. And never forget, the best way to protect the future is to build it,” matod ni Eamiguel.
Giawhag usab ni DNSC President Dr. Joy Sorrosa, ang mga gradweyts nga magkinabuhi nga may katuyoan, ug magpabilin nga lig-on ang pagtuo, kaugalingong kompiyansa, ug kalantip sa paghimo’g desisyon. Gipasabot niya nga ang kalampusan dili aksidente, apan bunga sa tinuyo ug tinarong nga paningkamot.
“True success is not an accident. It’s deliberate. Just as a farmer plants seeds expecting a harvest. You must intentionally sow seeds of hard work, perseverance, and faith to reap opportunities… Let God be the center of your pursuits and everything else will align,” sulti ni Sorrosa.
Sa mga nipaso, 113 niini mga iskolar sa Davao del Norte Learning Institute (DNLI) sa Probinsyal nga Panggamhanan, 180 – undergrad, ug 5 – graduate school.
Gikan sa 42 niaging tuig, niabot na’g 113 ka graduates karong tuiga. Ug gikan sa usa ka cum laude, duna nay lima (5) ka cum laude karong tuiga produkto sa DNLI.
Nagpaabot sa congratulatory greetings si Provincial Administrator Atty. Ralph dela Cruz, ang representante ni Gobernador Edwin I. Jubahib. “Daghan ta’g mga talent ug ang ilang mga natun-an, naeskwelahan, research and everything nga nakuha nila dinhi sa ilang pag-eskwela, magamit, mapuslan nato sa atong pagpalambo pa sa atong mga sistema, especially sa IT ug sa public administration,” ingon ni dela Cruz.
Dugang sab ni dela Cruz nga buot sa probinsya nga palapdan pa ang suporta sa mga scholars ilawom sa DNLI.
“Makalaom kita nga ato pa ning hatagan og igong suporta sa atong programa sa edukasyon, nga makapangita pa ta og dugang mga pondo ug dili lang pondo, other resources nga mamahimong tulay o susi aron daghan pang mga graduates ug mga scholars ang atong matabangan,” dugang niya.
Samtang, si Samuelle Marionne Sanchez sa KMD-PICKMO, ubos sa pagmando ni PICKMO Head Dr. Mervin Jay Suaybaguio, mipahibalo nga giplano na ang laing selebrasyon alang sa mga DNLI graduates karong Agosto 27 sa DavNor gym.
“We will invite all the graduates kay ato pud silang hatagan og pasidungog... Himoon nato ni nga selebrasyon sa kadaugan sa atong mga graduates sa DNLI. Ug pagpasalamat na pud sa atong partner school, DNSC, ug sa consortium partners University of Science and Technology in Southern Philippines ug University of Southeastern Philippines… apil na sa mga miyembro sa Provincial Advisory Board, and of course, kami sa secretariat dako og pagpasalamat sa atong mga graduates sa ilang pagsalig,” ingon ni Sanchez.
Bisan pa sa mga kakulian ug gaalburuto nga panahon, usa lamang ang gipamatud-an sa tibuok seremonya—ang edukasyon dili mapugngan.
Writer: Jun Rey VillanuevaPhotos: Andrew John Hababag & The Davao Reef
