Gipanawagan ang mas lig-on nga kooperasyon ug proaktibong mga lakang sa pag-atubang sa mga katalagman atol sa kick off ceremony sa pagsaulog sa National Disaster Resilience Month 2025 niadtong Hulyo 4, sa DavNor Gym, Sports and Tourism Complex, Mankilam, Tagum City.
Gipasiugdahan ang region-wide event sa DavNor Provincial Disaster Risk Reduction and Management Office (PDRRMO), ingo’g host karong tuiga, uban sa partisipasyon sa mga provincial ug city DRRMOs gikan sa nagkadaiyang lugar sa Region XI.
Ilawom sa temang “Kumikilos, Kayang Umaksyon ang Mamamayan: Isabuhay ang Kahandaan ng Bawat Isa Para Maging Ligtas sa Oras ng Sakuna – Para sa Kahandaan, Kaligtasan at Katatagan", gipalig-on ang panawagan alang sa mas aktibong partisipasyon sa tanang sektor sa katilingban sa pagpalambo sa kaandam sa katalagman.
Matod ni Office of Civil Defense (OCD) XI Regional Director Ednar Gempesaw Dayanghirang, kinahanglan nga seryosohon ang disaster preparedness pinaagi sa tinud-anay nga panaghiusa ug koordinasyon. Ingon niya nga ang papel sa OCD mao ang pag-aghat sa panaghiusa, apan ang kalampusan mag-agad sa kolektibong aksyon sa tanang partner agencies ug lokal nga mga yunit sa gobyerno.
“Ang OCD kung ibase sa balaod is only taking the lead, we do not assume anything or everything under the sun as mandate of the OCD, because the OCD sa amoang vision, mission, we take the lead towards disaster resilience. And it is true that regional disaster councils, kini ang atoang partners nga ania karon, kitang tanan, mao ang gitahasan to work together to collaborate in order we attain the goals of RA 10121 which is the disaster resilience or what we called, ‘Kalig-on batok Katalagman’,” sulti ni Dayanghirang.
Nitambong sa kalihokan si Dir. Merlinda Paragamac, OIC-Regional Director sa Department of Social Welfare and Development (DSWD) XI ug vice-chairperson sa Disaster Prevention and Mitigation Cluster, uban sa mga representante gikan sa PNP, BFP, kasundalohan, DOST, DILG, ug mga lokal nga LDRRM offices.
Si Atty. Ralph Dela Cruz, Provincial Administrator, mitambong usab isip opisyal nga representante ni Governor Edwin I. Jubahib.
Lakip sa mga gipanghatag atol sa kalihokan mao ang mga solar panels nga ipagamit sa nagkalain-laing PDRRMOs isip dugang suporta alang sa kahayag ug kaandam panahon sa emerhensiya.
Writer: Lorna TripoliPhotographer: Andrew John Hababag
