Kinatibuk-ang P310,000 nga cash incentives ang gitunol ni Governor Edwin I. Jubahib pinaagi sa Provincial Sports and Youth Development Office (PSYDO) sa 47 ka atleta nga nakasungkit og medalya sa Palarong Pambansa nga gipahigayon sa Ilocos Norte.
Matag gold medalist, nga gilangkoban sa 25 ka atleta, nakadawat og P10,000. Ang walo ka silver medalists nakadawat og tag-P4,000, samtang tag-P2,000 ang gitunol sa 14 ka bronze medalists.
Sulti ni Gov Jubahib nga dakong garbo sa probinsya ang bitbit nga kadaogan sa mga atleta rason nga pakusgan pa ang suporta sa sports program pinaagi sa pagbubo og dugang pondo. Gipasalamatan usab niya ang mga coaches nga adunay dakong papel sa kadaogan sa mga kabataang magdudula.
“Sa akong katapusang termino, ibubo nako ang tanang suporta alang sa atong sports facilities, coaches, ug mga atleta, tungod kay dili na kita maglisod sa pagpa-apruba sa budget sa Sangguniang Panlalawigan,” matod sa gobernador.
Sa laing bahin, gibutyag ni Rommel Jayektin, Sports Development Officer III sa PSYDO, nga nakatutok ang ilang buhatan karon sa pagpangandam sa mga kabatan-onang atleta alang sa umaabot nga Batang Pinoy ug Palarong Pambansa sa Agusan.
“Ang kadaugan nagsugod sa maayong training, disiplina, ug dedikasyon sa mga bata. Importante nga maminaw sila sa tambag sa ilang mga coaches, kay ang ilang tinguha mao ang kadaogan sa mga atleta,” ingon ni Jayektin.
Gipahigayon ang seremonya saPavilion sa DNSTC, Mankilam, Tagum City, niadtongHulyo 31, 2025.
Writer: Lorna Tripoli
