ARON MALIKAYAN ang naagoman sa Island Garden City of Samal (IGaCoS) ug ubang lungsod sa Davao del Norte sa sakit nga “dengue,” ipahinabo ni Gobernador (Kuya Gob Edwin Jubahib ang dungan nga pagpanglimpyo sa tibuok probinsya.

“Naa diay ta ‘Oplan Limpyo’ karong February 28, tibuok-probinsya na, manghinlo ta. Kanang linugitan sa lubi, botelya ikulob tanan. Manghinlo ta, tabangay ta labina nang stagnant nga canal ablihi ninyo para moagas nang tubig,” matod ni Kuya Gob didto sa lungsod sa San Isidro atol sa “Panaghisgot Alang sa Kalamboan,” Lunes, Pebrero 24.
Ang dungan tibuok-probinsya nga pagpanglimpyo nga programa ni Kuya Gob mao ang pinaka-una sa tibuok Rehiyon XI nga adto ipahinabo sa lungsod sa Carmen, Pebrero 28 pinaagi sa DavNor Provincial Health Office (PHO).

“Priority ni Kuya Gob (kay) paglingkod gyod niya daghan kaayo atoang cases sa dengue ug karon nag-
develop gyod mi; this is first in the whole region nga maghimo ta sa Davao del Norte ug provincial-wide dengue clean-up drive. Ang nadesisyonan namo nga every last Friday of the month atong himoon ang clean-up drive,” matod sa PHO department head.

Kahinumduman nga ang IGaCoS mideklarar ug State of Calamity sa miaging tuig tungod sa maong sakit ug panahon sa ting-ulan kasagaran na nga mosaka ang mataptan sa dengue.

“Walay moadto sa tourist destinations kung nahadlok sa dengue. Pahitaboon nato ang provincial-wide nga Oplan Linis. Magsugod ta February 28, every last Friday of the month, naa ta’y Oplan Linis. . Wa gyo’y laing kalaban sa dengue, pagpanglimpyo ra gyod,” pasabot ni Dr. Alfredo Lacerona didto sa Asuncion diin bahin kanunay sa “Panaghisgot Alang sa Kalamboan” ang pag-atiman sa panglawas.

Bisan habog nga lugar ang Talaingod gidasig sa DavNor PHO nga himoon gayod ang pagpanglimpyo.

“Gwapo kaayo inyohang lugar pero kung naay infectious diseases, basin magkaroon pa ug malaria, so i-
strengthened nato gihapon ang surveillance kay ang dengue man gud common siya sa baba ug sa highland. Naa ta’y bag-ong programa ni Kuya Gob nga every month naa ta’y simultaneous clean-up drive every last Friday of the month kada alas tres sa hapon,” pasabot ni Dr. Lacerona sa taga Talaingod.

Napilian ang Carmen nga himoan sa launching sanglit ang lungsod maoy usa sa malamposon nga LGU labot sa kampanya kontra dengue.



 

DavNor News