SUGDAN na pagtukod sa Pebrero 2020 ang tulo ka gatos nga mga balay alang sa tribung Ata-Manobo didto sa Sitio Nasilaban, Sitio Gatong sa Barangay Palma Gil ug laing usa ka gatos didto sa Sitio Mesolong, Barangay Sto. Niño, pulos sakop sa Talaingod, Davao del Norte.
“Karong bulan sa February mag-start ang atong construction ug upat kini ka bulan para mahuman kini nga project, sabay-sabay na nato ni kining three hundred houses,” pahayag ni Gobernador “Kuya Gob” Edwin I. Jubahib atol sa press conference human sa ground breaking ceremony sayo-sayo nga nagpahibalo sab nga aduna pa’y laing tulo ka gatos pa ka mga balay alang sa mga IP sa Talaingod sa lain nga sitios.
Ang mga balay adunay 26 Square Meters ang floor area nga semi-concrete ug ang ibabaw’ng bahin gibungbongan ug amakan nga may double walling nga plywood. Ang salog maoy 1 inch ang gibag-on marine plywood ug semi-plastic nga atop.
Kahinumduman nga niadtong miaging tuig misaad si Kuya Gob nga iya gyod patukoran ug mga balay ang mga IPs sa lain-laing sitios sa Talaingod aron maarang-arang ang ilang pagkinabuhi.
“Dako kaayo ang akong pasalamat in behalf sa katawhan sa Davao del Norte sa atong pinaka-palangga nga Presidente nga naghunahuna sa kaugmaon natong taga Davao del Norte, taga Talaingod, si Presidente Rodrigo Roa Duterte, sa buotan nga kasingkasing sa General Manager sa NHA nga sa pagpangayo nako sa project para sa Pabahay sa mga IP, si manager Jun Escalada, nga iya dayong gitubag ang atong hangyo niadtong 2019 ug karon na-realize na,” matod ni Kuya Gob.
Ug dili lang sa Talaingod, sa paghangyo ni Kuya Gob ang National Housing Authority mihatag sab ug kantidad 20 milyones alang sa 100 ka balay alang sa mga IP sa lungsod sa Kapalong, 20 milyones alang sa 100 ka balay para sa mga IP sa Asuncion, laing 20 milyones 100 ka balay para sa mga IP sa New Corella ug laing kantidad 20 milyones 100 ka mga balay para sa mga IP sa lungsod sa Sto. Tomas.
Alang sa taga Talaingod, dili lang Pabahay ang ilang madawat sa gobyerno hinuon lakip na niini ang patubig ug padayon ang paningkamot nga makaabot na sa ilang lugar ang suplay sa koryente nga dili na magsalit sa generator sets.
Tungod sa matinud-anong serbisyo sa presenteng gobyerno ilabina sa mga IP, matod ni Kuya Gob nga wala na’y rason nga mag-rebelde ang katawhan sanglit ang ilang mga mulo gipaningkamotan nga mahatagan ug kasulbaran sama sa pag-abli sa mga karsada padulong sa hilit nga mga lugar aron dali nga madala ang mga produkto sa uma, suporta sa agrikultura, pagpamuhi ug kahayopan, mga eskuylahan ug scholarship program ug daghan pang uban.
“Wala na’y hinungdan nga magrebelde pa ang katawhan sa Talaingod. Wala na’y rason nga ang katawhan sa Talaingod makigbatok pa sa atong gobyerno. Gikinahanglan nga kitang tanan dinhi sa Talaingod ug ang tanang lungsod, tanang katawhan sa Davao del Norte mosuporta na sa atong gobyerno sa Pilipinas kay gihatag na ang tanang tabang,” paniklop sa gobernador ng masa.
