Bisan pa man lawom na ang kagabhion ug padayon ang pagtaligsik, mapailubon nga gihulat sa mga lumulupyo sa Barangay Liboganon ug Barangay Busaon sa Tagum City ang hinanaling tabang nga gidalit sa Probinsyal nga Panggamhanan sa mga pamilya ug indibidwal nga labihang apektado sa pila ka adlaw nga sagunsong pagbunok sa ulan gumikan sa trough sa low pressure area nga nasinati sa Probinsya sugod Enero 30.

Malipayong gisugat sa mga biktima sa baha si Governor Edwin “Kuya Gov” Jubahib kauban ang mga opisyal ug mga personahe sa probinsya ug syudad sa Tagum sa panguna ni Vice Mayor Allan Rellon nga adunay dala nga init nga lugaw, tinapay, tubig ug uban pa nga makahupay sa katugnaw ug kagutom.

Kahinumduman nga walay hunong nga gibisita sa Gobernador ang mga evacuation centers ug mga lugar nga labihang naigo sa kalamidad aron masuta ang mga panginahanglanon sa mga biktima ug mahatod dayon ang tabang.

Matud ni Barangay Kagawad Edwin P. Ballesteros, 100 percent sa populasyon sa barangay ang apektado sa nasampit nga katalagman sanglit wala sila makapangandam sa grabe nga pagbaha. Apan, mapasalamaton gihapon sila nga wala sila pasagdi sa panggamhanan ilabi na sa probinsya ug sa lungsod.

Kauban sab sa pagpanghatag og packed meals ang pwersa sa kapulisan ug kasundalohan ug pribadong indibidwal sa panguna sa magtiayo'ng Larry Rubinos. Samtang, gilauman sab nga mang-apud-apod og relief goods ang panggamhanan ngadto sa mga biktima.

Gisaad ni Governor Jubahib nga sa labing dali nga panahon, mapanday ang master plan nga muhatag ug malungtarong solusyon sa problema sa baha gawas sa mga flood control projects nga kasamtanang gi-implementar sa probinsya.

Writer: Mervin Jay Z. Suaybaguio