200 ka pamilyang lumad sa Sitio Tapayanon ang nakaangkon sa ilang bag-ong balay nga gitunol sa gobyerno kanila pinaagi sa pagpaningkamot ni Governor Edwin “Kuya Gov” Jubahib atol sa Turn-over Ceremony sa Balay Ugpaanan to matig Tapayanon I & II, nga nahimutang sa Sitio Mondol, Brgy. Gupitan, Kapalong, niadtong Mayo 10, 2023.
Gi-turnover ang mga housing unit ngadto sa mga benepisyaryong lumad gikan sa National Housing Authority (NHA) sa pakigtambayayong sa Probinsyal nga Panggamhanan nga gipangulohan ni Kuya Gov, LGU Kapalong ubos sa liderato ni Mayor Maria Theresa Timbol, mga kasundalohan ug uban pang ahensiya sa gobyerno.
Sa mensahe ni Engr. Shariffidinn Nami, ang OIC Regional Director sa NHA, iyang gihangyo ang tanang mga benepisyaryo sa pag-amping sa ilang mga balay gumikan kay dili tanan ang mahatagan sa maong pribilehiyo. Gibutyag niya nga mokabat sa P200,000 ang kantidad sa matag housing unit. Nipasalig sab kini ngadto sa LGU Kapalong nga sa kanunay, ang ilang ahensiya padayong motabang ug mohatag sa susamang proyekto sa umalabot nga panahon.
Gipaabot ni Mayor Timbol ang iyang kalipay ug pagpasalamat nga nahuman na ang maong pabahay alang sa tribu nga makahatag kanila’g desenteng pinuy-anan. Nihangyo kini sa mga benepisyaryo sa pag-amping sa maong mga balay aron molungtad hangtud sa sunod nilang henerasyon. Nanaad kini sa paghatag sa mga batakang panginahanglanon sa mga tribu.
“Sa pila ka bulan nga atong gihulat ang atong 200 ka balay nahuman na gyud ug mapuy-an na nato kada pamilya. Pasalamat ta ani nga programa sa gobyerno nga gisugdan sa panahon ni Presidente Duterte ug gipadayon karon sa atong bag-ong Presidente Ferdinand “Bongbong” Marcos, Jr. ang pagsuporta sa atong mga miyembro sa atong tribu kay kabalo man ta… nga kamo ang kinahanglan padayon nga hatagan og tabang,” sumala ni Mayor Timbol.
Sa mensahe ni Kuya Gov nga gipaabot ni Executive Assistant Jemuel Melmida, iyang gibatbat ang mga pagpaningkamot sa gobernador nga mahatag ngadto sa mga lumad ang mga nag-unang panginahanglanon labi na ang pag-abri sa mga kadalanan ug pabahay, nga sa dugayng panahon ilang gidamgo ug gihandom.
Tumong sa gobernador nga matagamtaman sa mga lumad ang kaharuhay sa pamuyo ug paspas nga paghatud sa nagkadaiyang serbisyo gikan sa gobyerno.
“Permente lang gyud nato hunahunaon nga ang gobyerno naa gyud sa atoa kanunay. Mao nang kung unsa man ang mga serbisyo ang ipangtunol sa atoang mayor, sa atoang gobernador, sa atoang national agencies, sa atoang national government nga gipangulohan ni President Bongbong Marcos, ato gyud kini nga suportaan. Kay tungod ang serbisyo nga ilang gihatud kanato, kitang tanan nga katawhan dili lang sa Gupitan, dili lang sa lungsod sa Kapalong apan sa kinatibuk-ang probinsya ug sa kinatibuk-an sa Pilipinas, kitang tanan ang makabenepisyo niini,” matud ni Melmida.
Hilabihan ang gibating kalipay ug pagpasalamat sa mga lumad sa gobyerno ilabina kang Kuya Gov nga sa kadugayng panahon, nakaangkon na sila og nindut nga panimalay alang sa ilang pamilya.
Kahinumdoman nga si Kuya Gov ang pinakaunang elected official sa gobyerno nga nakaabot sa Sitio Tapayanon human kini nadiskobrehan sa mga kasundalohan.
Writer/Photos: Nestor Mata, Jr.
