“ANG silhig dili motindog sa usa lang ka tukog apan ang usa ka bugkos lig-on nga mobarog.”
Kooperasyon ang pinaka-unod (gist) sa mensahe ni Gobernador Edwin “Kuya Gob” Jubahib atol sa pag-abri sa Department of Social Welfare and Development (DSWD) Center for Children with Special Needs (CCSN) Martes, Pebrero 9 nga nahimutang likod sa Tagum City Hall. Apokon.
“Nahitabo ni tungod kay adunay pagtinabangay, collaboration between the LGU and the DSWD XI. . . Makita nato nga kung tanan aduna ang diwa sa pagtutulungan, pagsama-sama mas dali nato ma-realize ang atong gustong himoon for public service,” matod ni Kuya Gob atubangan sa mga opisyales sa DSWD gikan sa kaulohan, Rehiyon XI, probinsyal ug lokal nga mga opisyales nga gipangunahan ni Tagum City Mayor Allan Rellon.
Gisaysay ni Kuya Gob ang makitang ebidensya sa pagtinabangay sa probinsyal ug lokal nga mga opisyales sa tibuok probinsya.
“Sa Davao del Norte nag-create ko nga adunay LGU-Bayanihan. . Mihangyo ko sa ilaha nga tabangay ta, Lusong, Bayanihan-Lusong. . . In five months nahuman namo ug pakanal ang tibuok Davao del Norte with 5 meters width and 3 meters depth. Pag-abot sa ulan, in history wala na gyod mobaha ang Davao del Norte sugod adtong July 2019. . . So mao ni pag ang tanan diay magtinabangay, mas dali makab-ot ang kalamposan, mas dali ang paghatod ug serbisyo sa katawhan,” saysay sa gobernador sa nahitabong kooperasyon ilabina labot sa pagtampohay sa mga heavy equipments sa matag LGU.
Gipasiugda sa gobernador nga mas pa gikinahanglan ang kooperasyon ning panahon sa pandemya.
“Karon bisan nag-atubang ta ug pandemya COVID-19, ang tibuok Davao del Norte kanunay mi mag-miting, magtinabangay, counter-parting kung unsa ang dapat mahimo to address the pandemic, walay trabaho, nagsara nga mga establishments. . Pag walay trabaho, wala pod ta’y pagkaon. Because of that nag-create ko ug KAAGAPAY program. .Gihangyo nako ang tanang mayors nga tabangay ta, patamnon nato ug gulay ang tanang panimalay. Magtanom sila para diha kuhaon ang pagkaon,” pasabot ni Kuya Gob.
Ang KAAGAPAY maoy usa ka kalihokan kun KAwsa sa AGrikulturA ug PAnginabuhian sa barangaY nga nagdasig sa tanang panimalay nga mananom. Segurado ang “market” kun aduna’y sobrang gulayon kay mismo ang probinsya ang mopalit.
“Pinaagi ani nga Center for Children with Special Needs ang tanan nga mga bata nga kinahanglan matabangan sa gobyerno mao ni ang sagot. . Sa Tagum Tagumpay, sa probinsya, One Team, One DavNor. Open ang Kapitolyo sa paghatag ug suporta sa tanang programa sa Department of Social Welfare and Development dinhi sa probinsya,” pasalig sa gobernador nga mihatag ug libreng opisina sa DSWD provincial office diha sa Kapitolyo.
“Kini karong adlawa is another tagumpay . . . Ang passage nga “no one is lost” . . gusto namo nang i-adopt sa Tagum City. Any facility like this kung unsa’y pwede namo matabang amo’ng himoon. After all, that’s our mandate nga naa sa gobyerno,” pasalig sab ni Tagum City Mayor Allan Rellon.
