Bisan sa padayong kakuyaw sa pandemya, walay puas si Governor Edwin “Kuya Gob” Jubahib sa iyang padayon nga pagsuroy-suroy sa kabarangayan, aron ipabati ang pagpangga sa gobyerno sa katawhan.

“Mahalaga na maiparamdam natin sa mga kababayan natin na binibigyan natin sila ng importansiya,” sulti ni Kuya Gob sa mga sakop sa media nga mikuyog niya sa iyang pagtuyok sa kabukiran sa lungsod sa Talaingod.

Sugod pa sa iyang paglingkod isip bag-ong gobernador, way mintis nga ginaadto sa gobernador ang mga kabaranggayan, labi na ang mga lagyong dapit sa probinsya, sama sa mga komunidad sa Indigenous People (IPs) nga dugay napasagdan.

Tumong niya nga makahimamat ang mga lumulupyo aron makabalo siya sa ilang tinuod nga kahimtang ug mga mulo, aron nga iyang mahatagan og igong pagtagad kutob sa iyang makaya.

“Malaking bagay... yung pagpunta natin sa kanilang lugar. Na kahit malayo ay maramdaman nila na talagang mahal sila ng ating gobyerno at ng kanilang mga lider,” ingon sa gobernador.

Taliwala sa daghang trabaho ug bisita sa iyang opisina, mapangitaan gihapon og panahon sa gobernador ang pagbisita sa mga barangay.

Gawas sa paglusad ug pag-ebalwar sa mga importanteng proyekto, makita si Kuya Gob nga kanunay kuyog ang mga ahensiya sa gobyerno, local officials ug mga opisyales sa kasundaluhan ug kapulisan sa iyang pagbisita sa mga barangay.

Butyag sa gobernador nga samot siyang madasig sa malipayong pagdawat kaniya sa mga residente matag suroy niya sa mga komunidad.

“Malaki ang epekto dahil pagdating ko sa area nakikita ko na masaya sila... Nagkakaroon po sila ng lakas na loob at naiisip nila na ito talaga ang gobyerno na talagang binibigyan sila ng importansiya,” paghinapos ni Kuya Gob.

Usa ka ehemplo niini mao ang tulo ka beses nga giisa-isa og adto ni Kuya Gob ang tanang mga barangay sa probinsya panahon sa lockdown sa milabay nga tuig, aron mohatud sa mga food packs og aron masuta ang kahimtang sa katawhan.