Sayo nakadawat ug pinaskuhan ang mga barangay ug pamilya sa siyudad sa Panabo mahuman gihatdan sa ikatulong hugna sa Relief Operation na gipasiugda sa Probinsyal nga Panggamhanan sa Davao del Norte ubos sa administrasyon ni Kuya Gob Edwin I. Jubahib.
Adunay 73,805 ka pamilyang Panaboan ang nakatagamtam sa ayudang lima ka kilo nga bugas ug sa katibuk-an, kapin kon kulang 149,160 na ka pamilya sa Davao del Norte ang nahatagan, hain apil ang Munisipyo sa Dujali, Carmen, ug Santo Tomas.
Gipaabot ni Kuya Gob ang iyang mensahe ug pag-amuma pinaagi sa iyang Executive Assistant nga si Newell “Wowie” de Ramos.
“Gusto unta ni Kuya Gob na moanhi diri sa inyohang mga barangay kay naka plano na ni September pa aron maghatod ug ayuda, gamay nga maagang pamasko gikan sa probinsya sa Davao del Norte na tag lima ka kilong bugas. Bisan wala man karon ang presensya ni Kuya Gob, apan iyang gipabati sa katawhan ang iyang dakong presensya ug dakong gugma pinaagi niining among gidala nga bugas para sa inyong pamilya,” sulti ni de Ramos.
Walay puas pod nga nagpahinumdum si de Ramos sa istriktong pagpatuman sa Executive Order #63 ug unsa ang mga tulubagon sa mosupak niini. Gihisgutan sab ang paglikay sa “fake news” pinaagi sa pagpaminaw sa opisyal nga Radio station sa probinsya, ang Radyo 91.1.
Mapasalamaton si Apolinario Pantonial, ang Barangay Kapitan sa Kiotoy, tungod sa 3rd wave nga ayudang gihatag ni Kuya Gob, kay dako kini nga tabang sa mga katawhan ilabi na karong pag balik sa Modified General Community Quarantine (MGCQ).
“Wala gayod ko nagdahom na adunay dugang ayuda gikan kay Kuya Gob. Nagpasalamat ko sa iyang gihatag nga unang pamasko. Dugang grasya ni sa amoa kay pinaka importante gayod ang bugas ug dako kaayo ni ug tabang karong gibalik ang MGCQ," ingon ni Kapitan Pantonial
Magpadayon ang pag apod-apod ug mga bugas sa umaabot nga mga semana ug sa karon, anaa nay 104 ka mga barangay ug upat ka Local Government Units (LGUs) ang nahatagan sa mga ayuda ug musunod na pod ang siyudad sa IGACOS, Tagum, New Corella, Asuncion, San Isidro, Kapalong, ug Talaingod.
