Dili masukod ang kalipay na gibati sa mga residente sa Barangay Sta. Cruz, New Corella mahuman makaplagan ang pag taod ug kuryente sa ilahang mga purok na pila ka tuig na nila ginahandom.

Gipangunahan nila Hon. Prospero Estabillo ug Hon. Roger Laguna, Board Member sa Distrito Uno, Hon. Franklin Gentiles, Board Member sa Distrito Dos, Provincial Engineer Glen Olandria, Barangay Captain Daniel Boctoto, Municipal Executive Assistant Rolando Tumamac, ug NORDECO Representative Engr. Nilo Japay ang pag blessing ug pag turn-over sa Rural Electrification Project nga nag kantidad ug kapin 2.1 milyones.

Misulti ang Personal Assistant ug Representative ni Kuya Gob Edwin Jubahib nga gihatagan gayod sa gobernador ug dako na importansya ang maong electrification project ug ginatan-aw ang paglambo sa mga barangay nga wala na atiman sa milabay na administrasyon.

“Kini stimulus project gikan sa panudlanan sa probinsya in the amount of 2.1 milyon kapin mao nga gihatag gayod ug dako na importansya ni kuya gov ang maong electrification. Ginatan-aw gayod sa atong gobernador ang pag asenso ug pag develop sa mga barangay na wala na atiman sa mi-agi na administrasyon. Una ang electrification kay importante ma develop ang kalsada kay dili mubutang ug poste kung walay sakto nga kalsada,” pag pasabot ni Newwell de Ramos, ang representative ni Kuya Gob.

Dugang pa niya na gitutukan sa administrasyon ni Kuya Gob ang pagpabuhat ug kalsada ug pagpataod ug kuryente sa mga kabarangayan aron mas mudako pa ang kinatibuk-ang ekonomiya sa siyudad.

“Katong mga walay kalsada, gi abot gayod sa programa sa atong kuya gov aron kung aduna nay kalsada, aduna nay kuryente, musulod diha ang ekonomiya.Pwede na dayon musulod ang mga dagko na kompanya, dagko na mga negosyante para mutukod ug mga proyekto ug programa, negosyo diring dapita ug naa nay kasudlan nga trabaho ang mga lumulupyo dinhi,” pagsaysay ni de Ramos.

Mapasalamaton usab si Ricky Moria, ang SK Chairman sa barangay Sta. Cruz tungod kay gihatagan ni Kuya Gob ug pagtagad ang dugay na ginahandom sa mga residente.

“Unang una, dako kaayo ug pasalamat ang LGU sa barangay Sta. Cruz kay Kuya Gob na gihatagan ug pagtagad ang programang electrification na dugay na jud gihandom sa mga katawhan. Siguro wala pa ko natawo wala pa silay kuryente maong mapasalamaton gayod nga naabot ang proyekto na milyon ang kantidad,” ingon ni SK Chairman Moria.