Nasungkit sa lokal nga panggamhanan sa Island Garden City of Samal (IGaCoS) ang unang pwesto sa Ikatulong tuig sa Provincial Gawad Kalasag Award - Component City Category. Kini na ang ikatulong managsunod nga higayon sa pagdaug sa maong siyudad.
Tungod ana, giila sila isip unang LGU nga “Hall of Famer” sukad sa pagkamugna sa nahisgutang pasidungog diin papahulayon sila sa pag-apil sa duha ka tuig.
“Honestly no, dako gyud kaayo among kalipay ug garbo sa Island Garden City of Samal especially sa amoang Local Chief Executive, sa tanan sa LGU nga diin karong tuiga kami gihapon ang nigawas nga mananaug… Nasubo mi nga di na mi makaapil next year kay murag di na pud mi makadugang pa sa among pondo,” pagbutyag ni Janus D. Rafailes,CDRRMO IV, IGaCoS.
Kahinumdoman nga nideklara ang LGU sa IGaCoS ug State of Calamity niaging tuig tungod sa taas nga kaso sa dengue. Apan taliwala niana, nahimong makusganon ang ilang kampanya sa pagpakgang niini inubanan sa makanunayon sab nga pagpangandam sa hadla sa panahon, kusog nga hangin ug bagyo sa isla.
Nagpasalig si Mr. Eric R. Rosillo, Local DRRM Officer II nga walay angay kabalak-an ang IGaCos sanglit i-rekomenda sila sa Gawad Kalasag Award Regional Level sunod tuig.
Lakip sa mga mananaug ang Tagum City, sa ikaduhang pwesto ug Panabo City sa ikatulo alang sa component city category. Ilalom sa 1st - 3rd class municipality, nasungkit sa Kapalong ang unang ganti ug Carmen ang ikaduha. Alang sa 4th - 6th class municipality, naangkon sa B.E. Dujali ang unang ranggo ug San Isidro ang ikaduha. Sa Civil Society Organization nga kategorya, nakadaug ang Guardians Brotherhood Incorporated.
Ang unang mananaug nakadawat ug P50 mil ug plake, P30 mil ug plake ang ikaduha , P20 mil ug plake ang ikatulo ug P5 mil ang consolation. Gawas sa cash prize, ang tanang nagsalmot nakadawat ug duha ka emergency grab kit, ginatawag sab nga “balde of life” diin dunay sulod transmitter radio, flashlight, sardinas, bugas ug alkohol; ug laing lima ka first-aid kit.
Kuyog sa IGaCoS sa Hall of Famer ang Panabo National High School ug ang Maniki Central Elementary School sa school category.
