Gipangunahan ni Kuya Gov. Edwin I. Jubahib ang pagpanghatag sa Enhanced Comprehensive Local Integration Program (E-CLIP) assistance alang sa 124 ka mga Former Rebels (FR) o kanhing rebelde nga nibalik sa sabakan sa gobyerno nga nag-gikan sa silingang probinsya sa Davao del Norte, ang Bukidnon.

Dako ang pagpasalamat nila Battalion Commander Lt. Col. Silas Transmontero sa 89th Infantry Battalion ug Brigadier General Nolasco A. Mempin sa 1003rd Infantry Brigade nga wala nag duha-duha si Governor Jubahib nga tabangan ang mga kanhing rebelde. Kini atol sa usa ka pormal nga seremonyas nga gipahitabo sa kampo sa 89th IB didto sa Barangay New Visayas, Santo Tomas, Davao del Norte.

Tulo sa mga Former Rebels ang nakadawat ug 65,000 pesos nga livelihood assistance ug 121 ka mga Militia ng Bayan ang gihatagan ug 15,000 pesos nga financial assistance.

Gihangyo usab sa gobernador nga awhagon nila ang ilang mga kaparyentihan, pamilya ug higala lakip na ang mga kaubanan sa mga kanhing rebelde nga anaa pa gihapon nagalihok alang sa teroristang grupong CCP-NPA-NDF nga pabalikon na sa sabakan sa gobyerno aron sila mabuhi nga luwas sa kakuyaw ug magpuyo sa kinabuhing hamugaway.

Nisaad usab si Kuya Gov nga hatagan sila ug ayuda alang sa usa ka malungtarong agrikultura. Sila tagaan ug semilya sa mga “high value” nga mga tanom sama sa kahoy, gulay ug mga hayop nga pwede alimahan ug pasanayon.

Sa laing bahin, gisugdan na usab sa Probinsyal nga Panggamhanan sa Davao del Norte ang pagpanghatag sa imprastraktura sa patubig sa mga sitio lakip na ang mga solar power system nga maghatag ug suga sa mga ngilit ug bukid nga dapit labi na sa mga lugar sa mga Indigenous Peoples.

 

 

 

DavNor News