NANAWAGAN ang probinsyal nga panggamhanan ni Gobernador (Kuya Gob) Edwin I. Jubahib nga padayong himoon ang paninugdang (basic) tulumanon aron malikayan ang pagkuyanap sa sakit nga COVID-19.

Pinaagi ni DavNor Provincial Health Officer Dr. Alfredo Lacerona ug kasamtangang hepe sa Incident Command sa Provincial Task Force on COVID-19, iyang gipasibaw ang panawagan pinaagi sa programang ‘Kapihan sa DavNor’ Martes, Hunyo 8.

“Karon under man ta sa Modified General Community Quarantine, hangyo gyod ko sa atong kababayan kung pwede dili lang gihapon mogawas kung di lang gyod importante ang tuyo kay dili man gud lang kadtong mga OFW, kadtong gikan sa Manila, Cebu ang makuhaan ug COVID-19. Gani naa ta’y duha nga gikan sa Davao City. Mogawas lang ta sa balay kung importante. . Kay dili pasabot nga MGCQ na ta nga libre na sa COVID-19,” pagpasibaw sa Provincial Task Force Incident commander.

Kahinumduman nga wala na’y COVID positive ang probinsya hangtod gipatuman ang Balik Probinsya program diin ang nanguli nga Overseas Filipino Workers (OFWs) ug mga Local Stranded Individuals (LSI) mao ang nag-positibo sa sakit.

“Si Governor iya gyod gipanghingusgan nga tanan indibiduwal gikan sa gawas sa probinsya ato gyo’ng gipaningkamotan nga ma-isolate ug katorse diyas una siya maka-suroy-suroy, una makapaghimamat sa iyang kapamilya. . Tanang taga Davao del Norte nga mouli sa probinsya gihangyo nga mopailawom gyod sa mandatory 14-day quarantine diha sa isolation facility,” dugang pasabot sa DavNor PHO nga mapasalamaton kay ang nanguli andam magpa-isolate.

Aron mapadali ang ‘tracing’ niadtong naka-halobilo (contact) sa COVID positive, nag-himo ang DavNor sa System Developed Electronic COVID-19 Tracking System pinaagi’g pag-asayn ug Quick Response (QR) code sa tanan nga mosulod sa probinsya diha sa mga boundaries, sa barangay ug bisan online apil na ang sa Balik Probinsya program.

Alang sa maong programa, tanang 223 ka barangays sa probinsya gipalitan ni Kuya Gob ug gadget aron mag-gamit sa pag-scan.

“Balik Probinsya dili angay’ng kahadlokan kay bisan sila mismo nahibalo na sa ilang risgo. Gani imbes mouli sa ilahang balay, nahadlok sila basin makapasalubong ug COVID-19. Nakasabot sila nga mo-isolate sulod sa 14 ka adlaw. Una sila mouli sa ilaha segurado na nga dili na sila manakod. Nalipay ko nga ang barangay, purok leaders nagabantay kinsa tong bag-o moabot. Ila gyod nga gi-report sa surveillance, so mabantayan gyod,” paghupay ni Dr. Lacerona labot sa kahadlok sa mga nanguli maoy magdala sa sakit.

Wala hinuon gibale-wala ni Lacerona nga motaas pa ang COVID positive ilabina nga nag-MGCQ ang DavNor nga nakamatikod ang physical distancing wala kaayo gipadapat.

“Naa gyo’y possibility. Karon nga nag MGCQ na ta, dili gyod ma-kontrol ang tawo mogawas. Kung magdaghan pa ang tawo, maglisod ta’g contact tracing. . Wash Areas gina-implement sa tibuok probinsya. Social Distancing wala pa gyod nag-practice tanan. . . Hinaut atong sundon kanang basic nga protocol. Ang atong COVID-19 nga problema wala pa gyod mahuman bisan ug Modified GCQ na ta. Mas maayo gani nga atong hunahunaon nga mao pa’y pagsugod,” kusganong awhag sa doktor nga kusganong nag-awhag nga ang “Wear your facemasks, Observe physical distancing ug Wash your hands frequently” mao gihapon ang epektibong pangontra sa COVID.

Ning pagsulat adunay 9 ka mga COVID-19 positive nga kasamtangan gi-isolate ug gi-monitor.

 

DavNor News