ADLAW’NG SABADO ug dili ting-trabaho sa gobyerno apan wala kini isipa ni Gobernador Edwin I. Jubahib nga pahulay gikan sa puno sa eskedyul nga Lunes-Byernes trabaho sa Kapitolyo nga gigamit hinuon aron susihon ang kahimtang sa mga probinsyal hospital sa Davao del Norte.
Unang gibisita ni Gobernador Jubahib nga kasagaran tawgong “Kuya Gob” ang Kapalong District Hospital alang sa SIKAT cluster (San Isidro, Kapalong ug Talaingod).
Kahinumduman nga panahon sa oath-taking, gibutyag ni Kuya Gob nga ilawom sa iyang administrasyon iya gyod ipatuman ang “zero-billing” sa tanang hospital sa gobyerno ilabina ang tulo ka hospital sa probinsya bisan gani kung wala pa madawat ang pondo gikan sa Universal Health Care alang sa libreng serbisyo ug tambal.
“Karon advance na ta kay wala pa ang Universal Health Care nag-declare na ta nga libre,” matod ni Gobernador Edwin I. Jubahib sa iyang pagsusi sa kahimtang sa Kapalong District Hospital kauban si Mayor Theresa Timbol, Bise-mayor Edgardo Timbol ug hepe sa hospital nga si Dr. Jesse Belga nga nagpahibalo sa bag-ong napiling gobernador sa tinuod kahimtang sa tambalanan ug sa libre nga mga serbisyo.
Apan giklaro ni Kuya Gob nga ang medical certificates alang sa lahi nga katuyoan adunay bayad.
“Kining medical certificate to renew business licenses naa jud na’y bayad, medical certificate to claim insurance, certificate for professionals and teachers may bayad aron makatabang sa atong gipang-libre,” pagklaro sa gobernador nga nagpasabot sab nga ang medical certificate para sa financial assistance sa mga estudyante ug mga pobre.
Labot sa dental nga pag-atiman, ang pag-ibot lang sa ngipon ang libre ug wa na’y labot ang pasta, cleaning ug postiso.
Kasamtangan ang Kapalong District Hospital nga aduna lamang 60-bed capacity adunay ma-admit halos 100 hinungdan nga bisan sa agianan dunay mga pasyente. Hinuon duha ka bilding ang gidugang nga gipondohan sa Department of Health (DOH) aron mahimong 100-bed ang kapasidad dugang pa sa 12 ka pribado ug duha ka suite nga kwarto alang sa kapilian sa pasyente.
“Sa hospital ang economic enterprise nato mao ning private. Ang ward libre. Mao na’y tabang nato sa masa. Kung magpa-private sila bayad, at least mao nang pang-support nato, pang-subsidy, subsidized nato sa ward,” dugang ni Kuya Gob.
Sa mao ra nga adlaw’ng Sabado, human sa Kapalong gisusi una ni Kuya Gob ang gi-planohan nga relocation site sa mga coastal settlers sa Garinan una kini milahos sa Carmen District Hospital aron personal nga masayran ang kahimtang ug panginahanglan. Dayon gisusi sab ang Veterinary ug Livestock section sa Brgy. Salvacion, Panabo City. Ang pagbisita sa Samal District Hospital i-eskedyul na sab aron susihon ang kahimtang ug mga kinahanglanon.
