DILI lang ang kaabunda sa agrikultural nga mga produkto ang mabatonan atol sa pagsaulog sa ika 52 nga Kadagayaan Festival hinuon apil sab ang padayong paghatag serbisyo ilabina sa mga buntis nga nanay alang sa kaayohan sa ilang anak ug sa inahan, Huwebes, Hunyo 27.
Regular nga ginahimo sa Davao del Norte pinaagi sa Provincial Health Office (PHO) ang pagpahigayon ug Buntis Congress matag tuig aron maghatag ug hustong impormasyon alang sa hustong pag-atiman sa bata nga gisabak ug inahan gawas pa sa libreng serbisyo, tambal ug mga bitamina.
“Dili lang pag-lecture ang inyong madawat. Mahibal-an pa nato kung unsay nahitabo dinha sa inyong lawas karon. Eksaminon mo, tan-awon inyong ngipon, kadtong quality prenatal care dapat madawat gyod nato na. Dili nga basta mabuntis na mao na na siya. Daghan pa ka’g bantayan, daghan pa ka’g dapat imnon o dili imnon ug daghan pa ka’g dili dapat himoon,” matod ni PHO department head Dr. Alfredo Lacerona.
Gihatagan ug prayoridad ilabina ang mga buntis gikan sa lagyong dapit sama sa Talaingod sanglit sila ang distansya kaayo sa mga pasilidad nga naghatag ug pag-atiman. Sila usab ang pinaka-daghan ug mga anak bisan kung mga batan-on pa.
“Unsa man gyod ang tumong paghatag serbisyo ng gobyerno sa inyo? Mao nga i-reduce o bawasan o dapat wala’y mamatay sa inahan ug bata sa pananak. So mao na ang damgo nato dire sa Region XI. Kay dire sa atong probinsya wala gyo’y ingon nga zero ta. Kada tuig naa gyo’y mamatay nga nanay gikan sa pagbuntis. Nagkadaghan pod ang nangamatay nga bata, kanang tawag nato nga neo-natal mortality, infant mortality ug under five. . Dili ta gusto nga mahitabo na sa atoa,” matod ni Corazon ‘Acheng’ Mendez gikan sa DOH Region XI.
“So unsa’y dapat buhaton? Mao na ang Department of Health naa ta’y ‘Maternal Newborn Child Health and Nutrition Framework.’ Ang pinaka-damgo ani nga ma-improved ang health status nga mga nanay, mga babae ug mga bata. So mao na naghisgot ganina ug family planning. KInahanglan mag-adto gyod mo sa mga center, ma-pribado o gobyerno para makuha ninyo ang quality care. Para sa buntis dapat quality prenatal care ang atong makuha,” pagklaro sa personahe gikan sa DOH XI.
Gawas sa mga serbisyo, tambal ug bitamina, ang matag buntis nga mitambong nakadawat ug maternal kit aron magamit sa panahon sa ilang panganak.
