GIILA gayod sa probinsyal nga panggamhanan ang kontribusyon sa mga empleyado sa DavNor Kapitolyo sulod sa daghang katuigan nga paghago pinaagi sa paggahin ug panahon alang kanila, Hunyo 19 didto sa Molave Hotel, Tagum City.
Sa pagpanguna sa Provincial Human Resource Office (PHRMO), usa ka simple apan makahuloganon nga Salamat Mabuhay program “A Tribute to the Retirees” ang gipahigayon alang sa 18 ka mga retirado sa lain-laing gidugayon sa serbisyo publiko.
Nanguna sa gidugayon sulod sa 41.37 anyos nga panerbisyo si Ms. Vilma R. Silawan sa Provincial Assessor’s Office ingon man si Ms. Liliosa F. Confesor, RMT sa Provincial Economic Enterprise Development Office (PEEDO) sa gidugayon nga 40.14 ka tuig nga serbisyo. Ang Provincial Agriculture Office (PAGRO) biyaan sab nila Edgardo S. Ado ug Alfredo T. Avenido nga nagserbisyo ug 38.65 ug 35.87 ka tuig ang matag usa.
“Bisan dunay Memorandum gikan sa Civil Service Commission nga gahinan ug programa alang sa mga moretiro, dili kini ang unang rason gitan-aw sa probinsyal nga panggamhanan sa Davao del Norte. Gilantaw kini karon sa mga opisyales sa probinsya nga ilhon utang kabubut-on tungod sa inyong kontribusyon, kusog, katakos ug abilidad sa panahon nga kamo empleyado pa. Sa ngalan sa probinsyal nga panggamhanan, tugoti ako nga ipasibaw ang among kinasingkasing pasalamat kaninyo mga retirado ug ang among pasalamat gihimo nato matag tuig nga programa ingong pag-ila gayod sa inyong kahago sa mga panahon nga kamo anaa pa sa serbisyo publiko,” matod sa mensahe ni Gobernador Anthony del Rosario nga gihatod pinaagi ni Mr. Nemeses Nuñez sanglit duna sab laing kapareha importanteng aktibidades nga gitambongan.
Sanglit ang mga retirado kabahin na sa nagtubo Senior Citizens nga populasyon sa nasod, mihatag ug “tips” si Gob AGR.
Sit less. Sit less, ayaw mo’g sige’g lingkod. Live better and longer with a healthy lifestyle. Ayaw tugoti nga wala mo’y pisikal nga aktibidades aron mainat-inat pod ang inyong mga kaugatan ug maaktibo pod ang inyong mga kabukogan. . Daghang salamat mga retirees ug garbo gayod kamo sa Davao del Norte,” paniklop sa mensahe sa Gobernador.
Ang PHRMO nga maoy nanguna sa paghatag ug pasidungog sa mga retirado una nang nagpahigayon ug workshops aron dugang matudloan ang mga retirado sa pagdumala sa ilang pinansyal sa bag-ong yugto sa ilang kinabuhi.
