Gipadayag sa mga opisyales sa Davao del Norte, sa panguna ni Governor Edwin “Kuya Gob” Jubahib, ang dakong tabang sa Barangay Development Project (BDP) sa pagpatulin sa kalamboan sa mga “cleared” barangays sa probinsya.

Sa gipahigayon nga virtual launching sa BDP sa Davao Region, gihataga’g gibug-aton ni Kuya Gob, uban sa mga local officials, ang mahinungdanong epekto sa maong mga proyekto aron sa pagtunhay sa kalinaw ug kahapsay, nga maoy yawe sa kalamboan sa komunidad.

Miduyog sab kaniya sila Mayor Jose Relampagos sa Panabo City, Mayor Atty. Eufracio Dayaday, Jr sa Asuncion, Mayor Ma. Theresa Timbol sa Kapalong, ug mga kapitan sa nagkadaiyang mga recipient barangays, sa pagpalanog sa ilang dakong pasalamat kang Presidente Rodrigo Duterte “tungod sa iyang sinserong tumong nga mahuman ra gyud ang problema sa armadong pakigbisog.”

Ang BDP gimugna sa administrasyong Duterte aron sa pagpadayon sa kalampusan sa gobyerno sa pagpalingkawas sa 822 ka mga barangay sa nasud ubos sa impluwensiya sa Communist Party of the Philippines-New People’s Army (CPP-NPA).

Motabang ang programa sa pagtubag sa problema sa kapobrehon, sakit-sakit, pagkawalay oportunidad, inhustisya, ug kakulang sa serbisyo sa gobyerno.

Makadawat ang Davao del Norte og P700 million alang sa 35 ka mga barangay nga nawala na sa impluwensiya sa NPA.

Karong tuiga, 23 niini ka mga barangay ang makadawat og P20 million kada usa, samtang ang mabilin nga 12 ka mga barangay sa sunod tuig na makadawat.

Apil sa mga proyekto nga sugdan na pag-implemetar sunod bulan ang upgrading o kon pagsemento sa mga farm-to-market roads, health facility, water system, ug solar street lights.

Sulti ni Barangay Captain Felipe Portes sa Semong, Kapalong, Davao del Norte nga dakong benepisyo ang mahatag sa pagpasemento sa ilang dalan aron mapadali ug mamenosan ang ilang gasto sa pagdala sa ilang mga produkto ngadto sa merkado.

Gibutyag niya nga nawala na ang ilang kahadlok karon nga wala na ang mga rebeldeng NPA sa ilang lugar.

“Ang mga miyembro namo nga anaa kaniadto sa kalihukan sinsero na jud sila nga nibalik sa sabakan sa gobyerno tungud kay nakita nila ug nakabenepisyo sila sa mga proyekto,” sulti niya.

Gipahingusgan sab ni National Security Adviser Hermogenes Cendaña Esperon Jr. nga dili pork barrel ang pondo sa BDP, sanglit gigahin kini aron sa pagbuylo sa kalamboan sa mga barangay nga naluwas gikan sa pagkupot sa mga NPA.

Kauban sab sa maong virtual event sila Philippine Army commander, LtGen. Jose Faustino, Jr., Budget Secretary Atty. Wendel Avisado, 10th ID Commander MGen. Reuben Basiao, NTF-ELCAC Executive Director Allen Capuyan sa National Commission on Indigenous Peoples (NCIP) ug ubang mga local officials ug miyembro sa Regional Task Force-Ending Local Communist Armed Conflict (RTF-ELCAC).

 

 

 

 

 

 

 

DavNor News