Sadya ang pasko alang sa 93 nga mga misurender nga rebeldeng New People’s Army tungod sa nadawat nga ayuda gikan sa Department of Interior and Local Government pinaagi sa Enhanced Comprehensive Local Integration Program kon ECLIP.
Tag-P65,000 ang kantidad sa tseke ang gitunol ngadto sa mga regular combatants ug tag-P15, 000 usab alang sa mga miyembro sa Milisyang Bayan (MB). Wala pay labot ang tugbang nga kantidad sa matag armas nga isurender. Mikabat P3, 147, 000 ang kinatibuk-ang pondo ang gigahin niining tungora.
Si Tatay “Jack”, dili niya tinuod pangalan, 56 anyos, lumulopyo sa Pandaitan, Paquibato, Davao City, mapasalamaton tungod kay nakabalik siya sa sabakan sa gobyerno ug natabangan siya niini aron mapalambo iyang pamilya.
“Dako kaayo ko’g pasalamat sa gobyerno nga nakatabang gyud sa akoa, sa akong kalisud. Ikaduha, tabang sa tanang mga problema nako nga masulbad akong pagpanguma ba; sagingan,” matud niya.
Pahinumdom ni PCol Edgar Allan O. Okubo, Deputy Regional Director for Operations, Police Regional Office XI, nga planuhon pag-ayo ang salapi nga madawat gikan sa gobyerno alang sa ilang panginabuhi.
“Hindi ito gagamitin lang sa pang-inom o panggastos, pangpasyal. Ito po’y ayuda ng gobyerno para po mapa-improve, mapaganda ang kabuhayan ninyo. Malaki pong pera yan. Isipin po ninyong maigi para po sa pamilya ninyo at sa mga kinakailangan ninyong gamitin sa inyong pamumuhay,” dugang ni DRDO Okubo.
Sumala ni Provincial Social Welfare and Development Officer Rosalinda O. Rapista, 19 ka mga former rebels ang gikan sa Davao del Norte nga nagsurender sa 56th IB. Napulo niini mga regular combatants samtang siyam ang mga MB.
Tungod sa hangyo sa ubang probinsya sa Agusan ug Bukidnon, ang iyang buhatan usab ang naghimo sa profiling niining mga probinsyaha ug naghatag sa uban pang panginahanglan. Dunay natala nga 13 gikan sa Agusan.
“Ang role ng PSWDO is to conduct profiling of all surrenderees. As soon as nandyan na po ang JAPEC, we will do the profiling of each and everyone nga nagsurender. Aside from that, nag-extend kami ng immediate assistance like food assistance. Kung ano man ang kinakailangan ng mga FRs kami po ang nagpo-provide… In coordination po with our Kuya Gob Edwin Jubahib since our governor is very much supportive with this EO 70,” pagsaysay sa PSWDO.
Sukad sa kasaysayan sa Rehiyon 11, mao ni ang pinakapaspas nga pagproseso sa ECLIP sa DILG dinhi sa Davao del Norte kompara sa ubang probinsya. Mao ng handom sa mga kapulisan ug kasundaloan lakip na ang kinatibuk-ang lokal nga panggamhanan nga mas daghan pa ang mosurender sa mosunod nga bulan sunod tuig.
