Giila sa ilang dakong tabang sa katikaran sa Probinsyal nga Panggamhanan sa Davo del Norte, wala gipalabay sa Provincial Human Resource and Management Office ang pagpasidungog sa mga retirado karong tuiga bisan pa man sa pandemya.

”Sa atoang mga retirees nga nag-retire karong tuiga", sigon ni Michelle B. Claridad, Supervising Administrative Officer, PHRMO, "January 2020 until December 2020 and some of them katong late months sa 2019. Naa tay 44 ka retirees with some of them posthumous, katong wala gyud ka-retire pero unfortunately have joined our Creator. We also have recognized their efforts.”

Tulo ka buok ang mga posthumous karong tuiga. Apil na dinhi ang kanhing Board Member Dr. Daniel A. Lu nga gikamingawan sa kadaghanan labi na sa buhatan sa Sangguniang Panlalawigan.

Sa paagi nga luwas, duha lamang ka miyembro sa pamilya ang gitugotang makaduyog sa matag retirado sa pagdawat sa mga pahalipay sama sa service plaque, service ring nga 14-karat nga bulawan alang sa mga nakaalagad og 15 anyos pataas ug gibalik sab ang 201-file nga nagbitbit sa tanan nilang dokumento ug rekord sa ilang pagpanerbisyo alang sa mga walay kasong administratibo o "in good standing" ang ilang estado.

Nanguna sa pagtunol sa mga tokens si Provincial Administrator Engr. Josie Jean R. Rabanos kauban ang PHRM Officer nga si Edwin A. Palero ug ang mga department head sa mga retirado. Nadunggan sab ang mensahe sa pagpasalamat ni Kuya Gob Edwin I. Jubahib pinaagi sa usa ka video.

Plano ni Jose D. Pastor, Jr., Local Treasury Operations Officer IV, usa sa mga nagselebrar, nga sugdan niya ang bag-ong kabanata sa iyang kinabuhi.

“Time na siguro nga mo-focus ‘ta sa atong pamilya labi na 'ron nga naa na tay apo. We’ll spend our time nga maging happy with our family”, malipayon niyang pagbutyag.