Nagmalampuson ang sunod-sunod nga public hearing alang sa pag-usbaw sa fees and charges sa probinsyal nga panggamhanan sa Davao del Norte gikan Agosto 17 hangtud 27 ning tuiga.
Gipahigayon sa hiniusang team sa DavNor Sangguniang Panlalawigan Committee on Ways & Means/Games and Amusement, sa panguna ni Board Member Roy Catalan, kauban ang Provincial Treasurers’ Office (PTO) ug Provincial Assessor’s Office (PASSO), kuyog ang uban pang opisina sa Kapitolyo ang konsultasyon, isip pagsubay sa probisyon sa balaod usa kini ipatuman.
“Misunod jud ta sa probisyon nga nakabutang sa Local Government Code bag-o ta mag-impose ani nga fees. Maka-ensure mi sa inyoha nga minimal ra gyod,” sulti ni Acting Provincial Treasurer Evelyn Espra.
Pipila sa gisugyot nga usbaw sa bayronon sa pag-amenda sa Revised Revenue Code, ubos sa Provincial Tax Ordinance No. 2017-001, ang pagsaka sa singil sa certification of employment sa probinsya gikan P12 ngadto sa P20, samtang ang bayad sa nawala nga employee’s ID himoon ng P100 gikan P50. Ang kaniadto walay bayad nga paghulam sa plastic tables karon gi-propose nga pabayran na ug P20 matag usa.
Gipatas-an sab ang singil sa mga residente sa Luntiang Paraiso Regional Rehabilitation Center (LPRRC), diin ang Category A mobayad na og P12,000 gikan P8,000; sa Category B gikan P5,000 ngadto P8,000; Category C P5,500; Category D P4,000; ug ang Category E dili na libre ug duna nay bayad nga P3,000. Ug alang sa taga-gawas sa DavNor ang kanhi P12,000 himoong P15,000 samtang ang kanhi P8,000 himoon ng P12,000 ang matag bulan nga bayronon.
Sa katapusang hugna sa konsultasyon didto sa Babak, Island Garden City of Samal (IGaCos), giklaro ni BM Catalan nga sa tinuod gamay lang kini nga usbaw kung itandim sa nagasaka nga gasto sa panginabuhi sa lalawigan.
“Dili ni sa pagpataas lang sa buhis o sa inyong mga bayranan o sa inyong charges, kondili gipagamyan, gipagamyan ang mga pamuhisan, gipagamyan tungod kay dili kini haum sa atong panahon karun”, sulti niya.
Dugang niya nga dakong tabang ang usbaw sa bayronon aron dugang pondo sa programa ni Kuya Gov. Edwin I. Jubahib alang sa pangkalamboan, labi na ning panahon sa krisis sa coronavirus disease 2019 (Covid-19).
Apil niini ang DavNor KAAGAPAY Program (KAusa sa AGrikulturA ug PAnginabuhian sa BarangaY), nga nagtumong sa pagsiguro sa bastante nga pagkaon alang sa katawhang Dabaonon, panahon sa pandemya ug sa umalabot nga katuigan.
Kauban sab sa maong public hearing sa IGaCoS sila Provincial Assessor Engr. Joyce Gualberto, Assistant Provincial Assessor Engr. Lily Salazar, Acting Provincial General Services Officer Dr. Joseph Nilo Parreñas, Provincial Environment and Natural Resources Officer Dr. Romulo Tagalo ug uban pang mga opisyales.
