DILI HINOBRA UG PABUG-AT, hinuon makataronganon ang bag-o ug ang pag-usbaw sa ubang bayronon nga ipatuman sa probinsyal nga administrasyon ni Gobernador Kuya Gob Edwin I. Jubahib.
Kini maoy pipila lamang sa hinungdanong rason nga giklaro sa DavNor Provincial Treasurer’s Office ug Chairman Committee on Ways & Means Board Member Roy Catalan atol sa nagpadayong Public Hearing on the Proposed Updating of Fees and Charges for Amendments of the Revised Revenue Code under Provincial Tax Ordinance No. 2017-001 nga gihimo Agosto 17 hangtod 27.
“Actually, pag-determine man gud sa atong fees and charges naa ni batayan, sumbanan. Naa ta’y gina-consider ani. . Sa Local Government Code, once mag-impose kailangan nga reasonable, dili excessive, dili oppressive. Kailangan pod ang paninglon naay ability to pay. Misunod jud ta sa provision nga nakabutang sa Local Government Code bago ta nag-impose ani nga fees. Maka-ensure mi sa inyoha nga minimal ra gyod,” matod ni Ms. Evelyn Espra ang Acting Provincial Treasurer sa DavNor.
Wala hinuon kini magpasabot nga dili na “mahangyo” ang mga fees and charges hinungdan nga adunay gipahinabong public hearing sa tanang LGUs sa DavNor.
Ang presente’ng singil nga P12 alang sa mangayo’g “certified” kopya sa Probinsya himoon nga P20 samtang ang bayad sa nawala nga empleyado ID nga kaniadto P50 himoon nga P100. Ang kaniadto walay bayad nga paghulam sa plastic tables karon gi-propose nga pabayran na ug P20 matag usa.
Ang matag bulang bayronon sa mga Residente nga taga DavNor sa Luntiang Paraiso Regional Rehabilitation Center (LPRRC) gipatas-an sab. Ang Kategoriya A nga kaniadto mobayad ug P8,000 himoon nga P12,000; Kategoriya B gikan P5,000 ngadto P8,000; Kategoriya C P2,500 ngadto sa P5,500; Kategoriya D P1,000 ngadto P4,000; ug, Kategoriya E nga kaniadto walay bayad mohatag na ug P3,000. Ug alang sa taga-gawas sa DavNor ang kanhi P12,000 himoong P15,000 samtang ang kanhi P8,000 himoon P12,000 matag bulang bayronon.
Daghang “bag-o” nga mga serbisyo ang gitanyag sa Probinsya nga duna’y bayad. Diha gihapon sa LPRRC pwedeng mabatonan ang Purified/Mineral Drinking Water ug Alkaline Drinking Water. Ang PAGRO duna’y Vermi Cast ug Vermi Tea isip fertilizer alang sa organikong pamaagi sa pag-uma ug daghan pa.
“Kining Revised Revenue Code specific on local fees and charges under Tax Ordinance 2017-001. Nagpasabot niadto pa ning 2017 wala matrabaho tungod kay daghan pa pod mga priorities hangtod miabot ang election ug gi-refer sa akoa pero giuna ang public hearing labot sa tax properties balay ug building. Paghuman adto kini na pod unta apan sa dihang gi-prepare, ready na tanan, miabot si COVID. Dili ni tax kundili local fees and charges,” pasabot ni Ways & Means Committee Chairman BM Roy Catalan.
Ang pag-usbaw ug bag-ong fees and charges dako sab ug tabang aron molahutay ang flagship program ni Kuya Gob nga KAwsa sa AGrikulturA ug PAngiabuhian sa barangay (KAAGAPAY) diin libreng gipanghatag ang mga semilya sa gulay, kahoy ug bisan ang mga manok ug baboy nga ipabuhi sa mga benepisyaryo labi na ngadto sa mga sakop sa IPs, 4Ps ug WW kung “walang-wala” sa kinabuhi.
Bisan kun wala pa mahuman ang public hearing, mapasalamaton kaayo ang DavNor PTO ilabina si BM Catalan sa gipakitang pagpakabana sa katawhang Dabaonon sa ilang obligasyon.
