Gipakita sa mga miyembro sa Sangguniang Kabataan nga dako ilang suporta sa lakang ni Kuya Gob Edwin I. Jubahib nga mamahimong malungtaron ang agrikultura sa Davao del Norte pinaagi sa DavNor KAAGAPAY o Kawsa sa Agrikultura ug Panginabuhian sa Barangay, nga mao karon ang banner program sa bag-ong administrasyon.

Gipahitabo ang usa ka seminar-workshop aron mamahimong andam ang mga kabatan-onan sa ilang responsibilidad sa kalampusan sa DavNor KAAGAPAY. Pinaagi sa Provincial Environment and Natural Resources Office, Provincial Sports and Youth Development Office ug Sangguniang Kabataan Provincial Federation Office, gitapok ang mga batan-ong lider sa probinsya didto sa Sangguniang Panlungsod Building sa Dakbayan sa Panabo.

Sumala pa sa mga SK Municipal Federation Presidents, andam nila ihatag ilang hugot nga dedikasyon sa programa sa Probinsyal nga Panggamhanan kay sila nagatuo sa mga maayong adbokasiya ni Governor Jubahib.

Malipayon usab ang mga nag-organisa sa maong seminar-workshop sa mainiton nga pagsalmot sa mga kabatan-onan nga madasigon gayud sa pagdawat sa hagit sa ilang dakong responsibilidad.

Ang DavNor KAAGAPAY usa ka klase sa bayanihan diin ang matag pamilya, grupo o komunidad tagaan sa libre nga ayuda gikan sa Probinsyal nga Panggamhanan sama sa mga farm inputs, mga semilya ug nagkadaiyang teknolohiya aron masiguro nga mahimo kining malungtaron alang sa pagkab-ot sa tinguha nga matagaan ang katawhan sa kinabuhing hamugaway.

DavNor News