Target ni Kuya Gob. Edwin I. Jubahib nga humanon pagpasemento ang tanang mga main roads sa mga barangay sa Davao del Norte karong tuig 2021.
Kini aron madali ang pagdala sa abot sa kaumahan sa mercado, masayon ang paghatud sa mga nag-unang serbisyo sa katawhan sa barangay ug aron mapapaspas ang pagkab-ot sa tinuod ug maluntarong kalamboan para sa tanan.
Gipadayag sa gobernador ang maong tumong atol sa groundbreaking ceremonies sa upat ka mga road-concreting projects, nga mobalor sa P150 million, karong adlaw'ng Sabado.
Sugdan na sa Probinsiyal nga Kagamhanan ang maong mga proyekto, pinaagi sa pondo gikan sa Department of Budget and Management-Local Government Support Fund (DBM-LGSF).
Apil niini ang Buenavista Farm-to-Market Road sa Panabo City (P40M); New Katipunan-Pantaron Road sa Sto. Tomas (P30M); Visayan Village-Prk. Exodus-Prk. Rafael Road, Magugpo South, Tagum City (P40M); ug, Dasing-Monte Carlo FMR, sa New Corella (P40M).
Kauban sa maong mga proyekto ang drainage ug slope protection. Gibutyag sab ni 2nd District Congressman Alan Dujali nga duna pay laing P6 billion ang nasungkit niya nga mga proyekto gikan sa kauluhan, kauban si Kuya Gob.
Sulti sa gobernador nga daghan na’g nabuhat ang iyang administrasyon sa unang tuig sa iyang pagdumala tungud sa panaghiusa sa tanang mga elected officials, ubos sa bandera sa One DavNor, One Team. Dugang niya nga ang gilusad nga mga proyekto nagpamatuod nga wala niya hikalimti ang mga barangay sa patag.
Gipasabot ni Kuya Gob nga kanunay siyang nagaadto sa mga bukid-bukid nga bahin sa probinsya, sama sa Talaingod, gumikan kay giuna niya pagtabang ang mga kabus, ilabi na ang mga IPs, nga dugay nang gipasagdan sa gobyerno.
“Gi-una nato ang mga barangay nga uhaw kaayo sa mga serbisyo sa gobyerno. Pero, patas ang atong pagtan-aw sa tanang mga barangay,” ingon sa gobernador.
Kauban sab ni Kuya Gob sa groundbreaking ceremonies sila Arnold Alvarez, ang representante ni 1st District Congressman Pantaleon Alvarez, Panabo City Mayor Jose Relampagos, Sto. Tomas Mayor Ernesto Evangelista, Tagum City Mayor Allan Rellon, New Corella Mayor Jorjan Federiso, Provincial Administrator Engr. Josie Jean Rabanos, Provincial Planning Coordinator Nelson Plata, DNPPO Chief PCol. Ranie Hachuela, nagkadaiyang mga kapitan ug uban pang mga opisyales.
