Malumpuson nga gilunsad ang DavNor KAAGAPAY o KAwsa sa AGrikultura ug PAnginabuhian sa barangay, ang programang pang-agrikultura sa administrasyong Kuya Gov. Edwin I. Jubahib, didto sa Barangay Magatos, Asuncion, Davao del Norte.

Personal nga gitunol ni Governor Jubahib ang mga seedlings sa gulay ug “high-value” nga mga tanom sama sa kahoy, sorghum ug uban pa ngadto sa mga mag-uuma sa Asuncion. Malipayon usab nga gidawat sa mga benepisyaryo ang mga manok aron alimahan ug pasanayon.

Human sa opisyal nga seremonyas, nipaingon dayon ang mga nitambong ngadto sa tanaman aron sa pagtanom sa mga gulay ug mga kahoy. Ang mga nanambong gilangkoban sa mga opisyal sa Probinsyal nga Panggamhanan sa Davao del Norte nga gipanguluhan ni Governor Jubahib, mga department heads sa kapitolyo, mga opisyal sa Lokal nga Panggamhanan sa Asuncion nga gipanguluhan ni Mayor Eufracio Dayaday Jr., ug mga opisyal ug lumulupyo sa Barangay Magatos sa panguna ni Punong Barangay Emiliano Rabe. Nipasibaw ang mga nanambong sa ilang dakong suporta pinaagi sa Signing of Commitment.

Ang DavNor KAAGAPAY usa ka klase sa bayanihan diin ang matag pamilya, grupo o komunidad hatagan sa ayuda sa mga semilya sa “high value” nga mga tanom sama sa gulay, saging, falcata, mahogany, sorghum, lubi ug uban pa, ug mga hayop nga pwede alimahan o pasanayon. Tumong niini nga adunay igong suplay sa pagkaon, dugang kita sa katawhan sa malungtaron nga pamaagi ug pag-atiman sa kinaiyahan.

Sumala pa ni Governor Jubahib, sa pagkakaron, ang Probinsyal nga Panggamhanan ang mupalit sa mga abot sa katawhan. Andam pud kini sa pag-ayuda sa pagpangita ug “market” pinaagi sa usa ka cellphone application, ang DavNor KAAGAPAY app nga gidisenyo sa mga personahe sa IT sa kapitolyo.

Ang katawhan giyahan sa 300 ka mga personahe sa kapitolyo nga gipailawom sa mga training, ug kini sila tawagon nga mga Barangay Extension Workers nga ma-asayn sa tanang barangay sa Davao del Norte.

Ang DavNor KAAGAPAY usa pud ka pamaagi aron mahatagan sa humugaway nga kinabuhi ang katawhan aron ilang mabati ang pag-atiman sa gobyerno kanila. Andam kanunay ang administrasyon ni Governor Jubahib nga aksyonan ang nag-unang panginahanglan sa katawhan sama sa pagkaon, edukasyon, panginabuhian ug importanteng mga imprastraktura aron sila mahilayo sa tentasyon sa kalihukan sa New People’s Army kon NPA. Hugot ang pagtuo ni Governor Jubahib nga kung ang katawhan ug ang gobyerno magkahiusa, walay kalisud nga dili nato makaya.

 

 

 

 

 

 

 

DavNor News