SOBRA usa ka libo ug duha ka gatos lain-lain relihiyosong denominasyon sa Davao del Norte ang nakadawat ug hinabang gikan sa probinsyal nga panggamhanan ni Gobernador (Kuya Gob) Edwin I. Jubahib.
Ang tig-isa ka sakong bugas maoy gawas pa sa duha ka higayon nga gitunol nga mga food packs ni Kuya Gob (3 kilos bugas 3 de-lata; 5 kilos bugas 5 ka de-lata) ngadto sa tanang pamilya sa probinsya.
Matod ni Nestor Caong, Pastor sa Jesus is Lord Community nga pundok ug Focal Person sa God-Centered & Good Governance nga kampanya nga sanglit ang mga simbahan dili kalikay sa COVID-19 pandemic, usa gayod ka dakong tabang ang gihimo ni Kuya Gob.
“Ang mga simbahan na-lockdown sab, walay gipili. Kini nga lakang sa paghatag ug hinabang sa tanang religious leaders sa Davao del Norte dako ni nga kalipay ug dako na kaayo ning tabang particularly sa panahon karon. In behalf sa tanang mga pastors, ministers labi na sa mga independent nga mga simbahan ug fellowships, ako magpasalamat sa local government of Davao del Norte pinanguluhan sa atong Governor Edwin Ignacio Jubahib. Daghan, daghan gyod kaayong salamat Gob ug sa katibuk-an sa Davao del Norte,” matod sa Pastor sa JIL.
Gipahayag sab ni chairman Pastor Bernardo Marzon alang sa halos upat ka gatos nga mga independent churches sa Tagum City, ang ilang apresasyon sa pagka-mahunahunaon ug matinabangong aksyon ni Kuya Gob.
“Kami sa grupo sa mga pastors sa Fellowship sa Tagum City dako gyod kaayo ang among pasalamat unang-una ngadto sa Diyos labina kang Kuya Gob Edwin Jubahib kay duna gyod siya’y kasingkasing nga matinabangon sa nanginahanglan. In behalf of all the pastors, members sa fellowship sa Tagum City naka-appreciate mi sa kaayo sa atong Kuya Gob Edwin Jubahib, sa iyang pagka-mahigugmaon sa katawhan, pagka-matinabangon. Kining iyahang gi-initiate karon nga pag-apod-apod ug mga bugas dako kaayo ni nga tabang kay kabalo ta sa sitwasyon, nanginahanglan gyod ang atong kaigsoonan. Na-appreciate namo’g maayo ug gipasalamatan namo ang atoang Kuya Gob sa maong kalihokan,” matod ni chairman Bernardo Marzon alang sa grupo sa City of Tagum Ministerial Fellowships nga mga simbahan.
Iya sab gipanawagan ang iyang mga kaubanan nga sundon ang mga regulasyon sa kagamhanan.
“Akoang gi-awhag ang akoang mga kaubanan nga miembro sa Tagum City Ministerial Fellowship nga atong ipadayon ang pagsunod sa mga regulasyon sa atong mga LGUs, city ug province nga mga guidelines alang sa pagtuman sa Enhanced Community Quarantine ug sa mga mosunod nga mga semana magsugod na pod sa General Community Quarantine duna na po’y mga ginagmay nga kausaban sa mga guidelines. Kung unsa man ato lang gihapon sundon,” awhag ni Marzon.
Sanglit haduol lang, wala na hulata sa mga independent churches sa Tagum nga ihatod pa sa ilang tugkaran ang bugas samtang ang ubang lungsod ug syudad gipanghatod na atol ning pagsulat.
