Gi-realign sa Probinsyal nga Panggamhanan sa Davao del Norte ang 2020 Annual Budget niini aron gahinan og pondo nga P215.76-M ang emergency funds sa probinsya batok sa sakit nga COVID-19.
Ingon si Kuya Gov. Edwin I. Jubahib nga kini nagpakita sa pagkamatinud-anon sa probinsya sa paghatag sa kinatas-ang prayoridad aron mapugngan ang pagkuyanap sa maong sakit ug aron sab matabangan ang katawhang Dabaonon nga apektado sa epidemya.
“Kinahanglan kita mag-andam, ilabi na kung mosamot ang sitwasyon,” ingon sa gobernador.
Hangtud alas-3 karong hapon sa adlawng Martes, April 7, 2020, duna nay siyam ka positive cases ang probinsya nga karon admitted sa Davao Regional Medical Center (DRMC). Duna pud 26 ka Persons under Investigation (PUI) ug 232 ka Persons under Monitoring (PUM).
Katunga sa quick response fund (QRF) ang gikan sa gi-realign nga 20% development fund, samtang ang dugang P89 million gikan sa calamity fund sa probinsya.
Sulti ni Kuya Gov. nga ang QRF gitagana sa relief assistance, isolation rooms, personal protective equipment, hygiene kits ug provisions alang sa mga frontliners, mga medisina, medical equipment, decontamination chambers, disinfectants, ug daghan pang uban.
Sa milabay nga adlawng Biyernes, gipangunahan sa gobernador ang paglusad sa 30 ka isolation rooms alang sa mga persons under investigation (PUIs), isip usa sa mga epektibong paagi aron masumpo ang pagkuyanap sa makamatay nga sakit.
Karong adlawa usab, kuyog ni Kuya Gov. sila Vice Governor Rey Uy, Board Member Roger Laguna, Board Member Prospero Estabillo ug mga department heads, aron sugdan ang pagpang-apud-apud sa mga food packs sa mga lungsod sa Talaingod, Asuncion, New Corella, Carmen, ug Dujali.
Kapin 325,000 ka mga food packs ang giandam ug gilauman nga matiwas og pagpanagtag sa food assistance karong semanaha sa uban pang mga LGU, aron magtabangan ang mga pamilyang Dabaonon nga naapektuhan sa crisis sa COVID-19.
Kahinumduman nga sa milabay Domingo gipakanaog ni Kuya Gov. Jubahib ang Executive Order No. 31, Series of 2020, aron ipailawom ang probinsya sa Davao del Norte ubos sa Enhanced Community Quarantine gikan Abril 5, 2020 hangtud Abril 20, 2020.
