HANGTOD ning pagsulat wala pa’y natala nga COVID-19 sa Davao del Norte samtang gipatuman niini ang gipakusgang kampanya ug gipadako pa ang pondo aron pugngan ang pagkuyanap ug kadaot dala sa sakit.

Sa taho sa Provincial Disaster Risk Reduction and Management Council (PDRRMC), hangtod alas 2:00 sa hapon, Marso 26, 2020, walay pa’y natala nga kaso sa COVID-19 sa Davao del Norte.

Sa 36 ka mga PUIs, gipapauli na ang 24 ka pasyente nga negatibo ang resulta samtang ang laing 12 anaa karon sa DRMC sa Tagum City.

Ang duha ka PUIs nga namatay negatibo sab ang resulta sa COVID-19.

Samtang aduna pa’y 2,190 ka PUMs ilawom sa self-quarantine, ang 2,361 na-cleared na human sa 14 ka adlaw nga self-quarantine nga walay nakitang mga simtomas.

Ang pinaka-unang positibong kaso sa Davao Region naggikan sa silingang probinsya sa Davao de Oro ug gipagawas na sa Davao Regional Medical Center (DRMC) sa Tagum City niadtong Marso 24, 2020 human naulian gikan sa sakit.

Apan nagpahimangno si Kuya Gov. Edwin I. Jubahib sa katawhan nga dili mag-kumpyansa sanglit usa ka tawo gikan sa Makati City nakaplagan nga positibo ug kasamtangan nga gitambalan sa DRMC.

Matod ni Kuya Gob nga ang sayo nga pagpatuman sa probinsya sa gikinahanglang mga lakang, ang pagsunod sa mga Local Government Units sa direktiba sa kagamhanan ingon man ang kooperasyon sa katawhan ang nagpa-posible nga wala pa’y COVID-19 sa Davao del Norte.

Human gideklarar ni Presidente Rodrigo Duterte ang ‘State of Public Health Emergency’ nagpaggawas dayon si Kuya Gob ug P16 milyones ingong ‘Quick Response Fund’ (QRF) aron pugngan ang hulga sa virus dinhi sa probinsya.

Gipatas-an pa gyod sa Gobernador ang QRF ngadot sa P60.9 milyones.

Gideklarar usab sa gobernador ang community quarantine nga nagpatuman ug mga lakang batok pagkuyanap sa sakit sama sa ‘roadblocking’ sa probinsyal nga mga utlanan, nagdili sa publikong panagtapok ug nagpatuman sa pag-sanitize sa mga pasilidad sa probinsya.

Estrikto sab nga gipatuman ni Kuya Gob ang Davao Region COVID-19 Task Force Order No. 11 ilabina ang pagdili sa kalihokan sa katawhan ug mga sakyanan nga nagpakanaog ug curfew gikan alas 9:00 sa gabii hangtod sa alas 5:00 sa buntag ingon man ang pagpatuman sa liquor ban sulod sa probinsya.

Gawas niini nagpatukod ang probinsyal nga panggamhanan ni Gobernador Jubahib ug 45 ka isolation rooms diin 15 niini andam nang gamiton diha sa DavNor Hospital Kapalong Zone ug ang laing 30 kasamtangang gitukod diha sa DavNor Hospital Carmen Zone.

 

 

 

DavNor News