WALAY LANGAN nga gigahin ni Gobernador Kuya Gov. Edwin I. Jubahib ang Dise-sayis Milyones (P16M) pesos nga pondo aron magamit sa pagpugong sa pagsulod sa sakit nga novel corona virus kun COVID-19.
Sa unang quarterly miting gabii sa Myerkoles, Marso 10, giuyonan ang pondo gikan sa na-savings nga Quick Response Fund (QRF) sa Provincial Disaster Risk Reduction Council (PDRRMC) sa mga miaging tuig aron magamit pagpalit ug mga himan nga maka-detect sa COVID-19.
“In our province kailangan mag-prepare ta kay la ta kabalo mapasukan tayo. The PDR budget instead of equipment (flood mitigating projects), we buy Thermal Machine to detect the heat (sa tawo). Kailangan magpalit ta. Also we required the municipalities nga mopalit aning thermal machine and kailangan munisipyo down to the barangay level maging surveillant kung mayrong nag-travel from abroad o nagkasakit ng flu kailangan ma-report agad then mapuntahan sa provincial and municipal health officials. . Gamiton nato atong Provincial Disaster Funds, tagaan nato ni siya’g priority, life is important,” pasabot ni Kuya Gob sa paggahin sa maong pondo.
Sa pinaka-sayo nga panahon gusto ni Kuya Gob nga mitingon tanang mayores ug kapitanes sa tibuok sa 11 ka LGUs sa Davao del Norte.
“Miting sa mayors ug barangay captains kinahanglan i-ASAP para ma-spread ang information unsaon ma-prevent kini nga corona virus. Kinahanglan ma-educate ang tanan,” dugang pasabot sa gobernador.
Niadtong Marso 9 (Lunes), nagpagawas na ug Health Advisory No. 2020-003 ang gobernador nga kinahanglan sundon sa publiko. Naglakip kini sa pabiling mabinantayon ug himoon kanunay ang mga lakang sama sa hustong pagpanglimpyo, dili makig-duol sa daghang tawo (social distancing) ug ilabina ang pagtabon sa baba kun mag-ubo o mag-hatsing.
Gipasiugda sab sa health advisory ang kanunay’ng paggamit sa hand sanitizers ug alcohol sa dili pa mosulod ug mogawas sa opisina; regular nga paghinlo sa mga railings, gunitanan sa pultahan nga kanunay mahikap sa tawo, ug ilabina ang pagtambong sa dagkong mga panag-katigom. Bisan ang pag-adto sa mga lugar nga gikataho nga dunay kaso sa COVID gidili sab.
Bisan ang na-eskedyul na nga Oplan TABANG sa Dacudao, San Isidro ug ang mga nagsunod niini gi-kanselar una sa gobernador.
Hinuon atol sa Provincial Development Council (PDC) kagahapon, Marso 11, gisultihan ni Provincial Health Officer Dr Alfredo Lacerona nga dili angay mag-panic ang publiko.
“In our case sa Davao del Norte, we are sure that we can prevent pagsulod sa COVID virus kay ang surveillances sa health is strong. In fact, ang atong first PUI sa Davao del Norte nakita to siya sa barangay level. So ing-ana ka strong ang atong surveillance system,” matod ni Dr. Lacerona nga dugang miingon dili hinuon angay mag-kumpyansa bisan pa man kung ang pangandam nila gisabotan na niadtong Enero pa.
