DILI LANG PATAY, pagpamusil o dakop ang mahitungod sa kampanya kontra illegal-droga sa Pilipinas ilabina sa Davao del Norte.
Kini gipamatud-an sa P30 milyones tulo ka bag-ong mga bilding nga adunay duha tig-kalim-an (50) ka tawo ang masulod pang-lalaki dormitoryo ug usa alang sa babaye sa Luntiang Paraiso Regional Rehabilitation Center (LPRRC) gawas pa sa bag-ong mess hall ug bleachers nga gi-inagurahan Byernes, Pebrero 21.
Sa kasamtangan adunay 136 ka mga “Kuya-Ate,” ingong maoy pagtawag sa mga pasyente-residente ug gilaoman nga moluag na ang higdaanan ug mahimong sayon ang paglihok.
“We have been receiving a lot ug mga batikos from other countries because of our campaign against (illegal) drugs. They’re not knowing that we have been doing a lot of things. Ang kaingon nila puro patay, puro dakop pero wala sila kabalo nga there are lot of programs by the government especially by President Rodrigo Duterte, nga dili diay puro patay. The government has been spending a lot of money just to eliminate or trip this social menace, the use of illegal drugs,” matod ni Dr. Joseph Nilo Parreñas, ang Chief sa LPRRC.
“Sa atong ginahimo nga paningkamot, naa atong judge, prosecutor, atong mga lawmakers, different offices of the government, maayo unta to’g mahibaw-an sa tanan nga we have been doing a lot most especially under the leadership of our governor Edwin I. Jubahib. Daghan ta’g gihimo when it comes to drug eradication,” padayong pasabot ni Dr. Parreñas nga nagtug-an sa giandam sa Provincial Engineering Office nga Program of Works (PoW) alang sa paghimo ug 45 units outdoor showers, dugang comfort rooms sanglit tig-unom lang ka CR/showers ang matag bilding.
Gawas sa maong pasilidad, migahin pa gyod ang probinsyal nga panggamhanan ni Kuya Gob Edwin Jubahib ug P500,000 alang sa water-drilling sa LPRRC gawas pa sa Sports program alang sa mga Kuya-Ate ingon man pagpalit ug pagpalambo sa kasamtangang sports facilities.
“Maybe this month or next month we have our own water system inside the Luntian. . Within this year, tukod ta ug infirmary dire, a medical, dental clinic separate from each other,” dugang maayong balita ni Dr. Parreñas.
Atol sa inagurasyon, gipahinabo sab ang ika-pitong “gradwasyon” sa kawhaa’g pito (27) ka “Kuya-Ate” human sa napulo’g walo (18) ka bulan nga Aftercare Program sa LPRRC.
Mopailawom una sa unom ka bulan nga rehabilitasyon ang mga pasyente-residente sulod sa LPRRC sa dili pa ang 18 ka bulan nga ‘Aftercare’ ug samtang anaa sila sa gawas kinahanglang estrikto nilang sundon ang mga gilatid alang sa ilang pagkahimong “gradwado.”
Gitambongan ni DavNor Board Members Dr. Daniel Lu ug Roger Laguna, Prosecutor Norman Solis, Judge Celestial Aranda-Gonzales sa DavOro, SAO/ACP Coordinator Gabby Logronio ang ika-7 nga gradwasyon.
