GIPAHUGTAN pa sa probinsyal nga panggamhanan ni Kuya Gob Edwin I. Jubahib nga dili gayod makasulod ang African Swine Fever kun ASF dinhi sa Davao del Norte nga naghimo sa entry checkpoints gikan sa unom ngadto sa kawhaan ug walo (28).
Sa paglibot sa DavNor team sa munisipyo sa Braulio E. Dujali ug Carmen, kini nahimong kabahin sa “Panaghisgot Alang sa Kalamboan” pinaagi sa Provincial Veterinary Office ang paghatag ug ‘updates’ labot sa maong sakit sa baboy.
“With regards to updates ining gitawag nga African Swine Fever, sa kasamtangan Davao Occidental miabot na sa Davao City, specifically barangay Dominga, then even Toril. We are closely monitoring the boundaries of Paquibato and Panabo nga dunay distansya lang nga seven to ten kilometres. Then naa pa gyo’y dalan nga deretso sa Calinan diha sa crossing Malativas and Malabog. So daghan ta’g gibantayan. From six checkpoints nahimo na karon nga twenty-eight province wide,” matod ni Dr. Renato Embate nga nagtug-an nga diha pa lang sa Panabo daghan ang nasakpan nga gusto magpasulod ug karne pinaagi sa mga habal-habal.
Gitug-an sab sa DavNor PVO nga ang gi-report sa Braulio E. Dujali labot sa namatay’ng baboy nga nagpakita ug mga ilhanan sa sakit nahibaloan nga negatibo sa ASF.
“Immediately nagkuha dayo’g sample for laboratory confirmation, luckily negative sa Swine Fever. Di ta angay mabalaka pero ato lang gyod i-strengthened ug maayo ang pagka-vigilant ug ang atong massive information sa African Swine Fever para ang atong mga farmers di mag-panic,” dugang ni Embate.
Nanawagan sab ang DavNor PVO nga hugot magbantay kontra ASF ug i-report dayon kung adunay gidudahan nga pagkamatay sa baboy.
“Makatabang mo’g maayo sa atong mga stakeholders labina mga backyard raisers. . Kung duna’y mga balita. . ‘tong didto sa Limao, San Isidro nga naay daghan nangamatay only to find out nga fake news sa pag-verify. . So ing-ana ang uban natong mga livestock traders nga gusto pod magpahimulos sa maong
sitwasyon,”matod sa beterinaryo nga duna sab mga report gikan sa Sto. Tomas ug Kapalong apan ilang gi-aksyonan dayon.
“After all ang result sa surveillance pahibaw-on gyod mo,” pasalig ni Embate.
Gisubli sab ni Dr. Embate ang maong updates ug panawagan didto sa Carmen.
“Sa karon ang Davao del Norte is still green color zone, meaning African Swine Fever free. Ang atong threat karon ang adjacent barangays of Davao City. It’s a matter of three to seven kilometres from the boundary of San Roque, Panabo even Katualan, maoy pinakaduol, Consolacion, Malativas bantayan nato. . . Let’s all be vigilant, informed atong kasilinganan,” awhag ni Embate sa mga opisyales sa Carmen.
Hangtod ning pagsulat, giangkon sa DavNor PVO nga wala pa’y nadiskubre nga vaccine kontra ASF ug aduna kini 100% nga mortality kung mataptan gayod ang baboy.
Gawas sa ASF, giawhag sab ang hugot nga implementasyon kontra rabies ilawom sa Provincial Ordinance 2019-004.
