GIILA ug gipasidunggan sa probinsyal nga panggamhanan ni Gobernador “Kuya Gob” Edwin I. Jubahib ang upat ka mga medalistang atleta sa Davao del Norte sa bag-o lang natapos nga Southeast Asian Games Nobyembre 30-Disyembre 11, 2019.

“Wala masayod ang tanan nga kadtong SEA Games adunay upat ka taga Davao del Norte ang misalmot. Karong buntaga atoa silang pasidunggan,” pagpaila-ila ni Provincial Sports & Youth Development Office (PSYDO) department head Giovanni Gulanes sa mga DavNor atleta.

Gipangunahan ni boxing gold medallist Charly Suarez nga taga Sawata, San Isidro, boxing silver medallist Marjon Piañar, sa Panabo City, Tagum City gymnastics finalist Dana Sabio ug wrestling silver medallist Jiah Pingot ang pagbutang sa Davao del Norte diha sa mapa sa natad sa sports dili lang sa Pilipinas lakip na sa tibuok kalibotan.

Duha lang hinuon ang nakatambong sa pagpasidungog sanglit mideretso dayon ang uban sa training didto sa Manila, apan ang usa ka motorcade libot sa probinsya himoon dihang makompleto na ang upat.

“Tungod sa mga suporta ni Governor, kay mayor, sa mga opisyales sa tibuok Davao del Norte nga maoy nagpakusog kanako uban sa akong training,” matod ni boxing gold medallist Charly Suarez nga nagdasig ilabina sa mga batan-on nga aktibong moapil sa sports.

Naghatag sab ug “tips” ang boksidor nga taga Sawata, San Isidro.

“Paningkamot. Una, naggikan sa pangutok; ikaduha, naggikan sa kasingkasing ug ikatulo, paningkamot naggikan sa pagpursige kaugalingon. Sa mga kabatan-onan nindot gyod nga moapil ka sa sports. Una naghatag ka ug karangalan sa atong lugar; ikaduha, makalayo ka sa bisyo; ikatulo, maka-challenge ka sa mga tao nga mosunoray kanimo,” pagdasig ni Suarez.