PUNO sa paglaum si Gobernador “Kuya Gob” Edwin I. Jubahib alang sa hayag nga kaugmaon sa tibuok probinsya sa Davao del Norte.
Kini ang unod sa iyang mensahe atol sa pinakaunang 2020 Convocation Program nga gitambongan sa mga deparment heads ug empleyado sa Kapitolyo, Lunes, Enero 6, 2020 nga mapasalamaton tungod sa nakab-ot nga kalamposan sa milabay’ng unom ka bulan nga administrasyon.
“Atong pasalamatan ang matag usa kanato sa milabayng tuig 2019. Ang tanan nga accomplishment dili nato makuha kung wala ang inyohang participation ug full support sa atong administrasyon,” pasalamat ni Kuya Gob ug nagtug-an nga iyang nasuta ang suporta dihang iyang gilusad ang programang Oplan TABANG, programa sa iyang administrasyon sa paghatod-serbisyo ngadto sa hilit, kabus (GIDA) nga mga lugar.
Uban sa kooperasyon sa Sangguniang Panlalawiga, positibo ang gobernador alang sa paspas nga paghatod sa mga serbisyo sa 2020.
“Kung nahimo nato sa lima ka bulan sa 2019 nga ma-survived ang bag-ong administrasyon, segurado ko nga kaya natong i-triple ang paghatod ug serbisyo karong tuiga 2020 for the implementation of my dreams, the development of our beloved province Davao del Norte. With the support of our legislative headed by our Vice Governor Rey Uy ug sa tanang Board Members, mora’g bullet-train ang implementation karon sa atong mga projects. Ug nakita nako sa inyohang gihimo sugod adtong July 1,” positibong pahayag ni Kuya Gob.
Lakip sa mga proyekto ug serbisyo nga ipaabot sa iyang administrasyon mao ang padayon nga zero-billing sa tanang provincial hospitals, ang plano sa pag-construct upat ka bag-ong Rural Health Units sa New Corella, Asuncion, Talaingod ug Sto. Tomas ug usa ka infirmary hospital sa Panabo City. Iya sab nga butangan ug duha ka Dialysis Machine ang Kapalong ug IGACOS Zone hospitals aron mahimong duol ug sayon sa mga taga Davao del Norte nga nagpuyo sa maong mga lugar.
Ipadayon sab ni Gobernador Edwin Jubahib ang paghatod sa Oplan Tapok sa Barangay Alang sa Nanginahanglan ug Galisod (Oplan TABANG), Oplan Canal ug mga proyekto sa panginabuhian sama sa pagtanom ug sorghum diha sa mga sagingan nga nadaot sa Fusarium Wilt ug sa mga bakanteng luna sulod sa IP Ancestral Domain.
Malipayong gipahibalo sa gobernador nga ang probinsya sa Davao del Norte mao ang himoong pilot study area sa Department of Agriculture gawas pa sa gihan-ay na nga plano alang sa palay-buying.
“Naa ta’y programa karon nga ang atong probinsya mag-spearhead sa rice-buying para ang atong mga farmer mabuhi. Kinahanglan nga mo-intervene kita nga taga-gobyerno, mao na nga mo-engage ta ug rice-buying. . Mag-set aside ta ug budget para sa rice buying,” pasalig ni Kuya Gob ingong pagtabang sa mga mag-uuma nga apektado sa pag-us-os sa presyo sa palay.
Sa Lunes nga convocation nga may tema ‘Ang Taon ay Masagana sa Probinsyang Nagkakaisa’ gitug-an ni Kuya Gob nga ang iyang administrasyon determinado sab nga palamboon ang eco-tourism ug economic enterprise aron matubag ang daghan libreng social services sa DavNor.
