SUKAD nga gipatuman ang zero-billing sa tanang hospital sa probinsya sugod niadtong Hulyo 1, 2019 mibaha sab ang daghang pasalamat.
Usa lamang si Romeo Llana, 72 anyos nga taga San Francisco, Panabo City ug kaduha na na-admit sa Carmen District Hospital (CDH) miangkon nga sa una niyang admit duna siya’y gibayran ug hilabihang lipaya dihang nasayran nga zero-billing na ang iyang pagpatambal lakip na unya ang medisina nga dad-on bale tulo ka adlaw.
“Wala ko kabalo ana. Karon lang. Maayo, pasalamat ta sa iyaha nga nakatabang siya sa mga pobre sama nako,” matod ni Romeo nga naghigda lang sa katre.
Si Mrs. Rose Hinong nga taga Purok 16 sa lungsod sa Carmen maoy nagbantay sa iyang anak-pasyente nga si Ronnie ug nalipay pag-ayo sa zero-billing sanglit Domingo pa diha na sila sa hospital.
“Maayo kaayo na kay makatabang. Sa amo po’ng na-obserbahan sa pagsulod namo nakakuha na mi’g tambal didto sa parmasya basta naa. Ug wala sa parmasya, kapalit jud mi sa gawas. Daghan kaayong salamat nga ing-ana ang programa ni Kuya Gob Jubahib nga maka-avail ang mga tao nga walay kwarta kay aron pod maka-kuan sa kalisod,” matod ni Mrs. Rose.
Si Mrs. Roselyn Cantarona taga Tubod, Carmen nga naadmit niadto pang Lunes tungod sa hubak mapasalamaton kaayo ug andam sab mopalit sa gikinahanglang tambal pananglit nahurot na kini.
“Zero-zero. . Nindot sir. Daghan salamat sa iyahang suporta sa mga kabos nga iyang gitabangan. Dako kaayo ni sama namo nga walay makuot nga tinigom. . Kang Kuya Gob Edwin daghang salamat sa imong programa, salamat sa tanan-tanan nga imong natabang sa mga kabos,” matod ni Mrs. Roselyn nga mogawas na sa ospital kauban ang iyang bana.
Kahinumduman nga niadtong Hulyo 6, gibisita ni Kuya Gob Edwin Jubahib ang CDH ug nakita mismo ang kahimtang sa tambalanan ug palibot niini ilabina ang swampy area nga mahimong itloganan sa lamok.
“Nagapasalamat gyod sa atong administrasyon sa karon kay Governor, kay gibuhatan jud ug paagi nga matambakan ang dakong problema, dugay na natong problema sa swampy area dire sa likod sa hospital. Kining swampy since, naging always problem ni siya sa atong epidemya sa dengue. Dako kaayo siyang tabang dili lang sa amoa dire sa hospital kundili sa atong komunidad. Gitambakan na nila. Dili pa jud tanan pero gihinay-hinay kay syempre nagakuha pod sa source. Pero dako na gyod kaayo ang kausaban,” matod ni Dr. Juri Miyaki, ang hepe sa CDH.
Ang kanhi napuno sa mga pasyente nga agianan nalimpyo na pod ug napahiluna na sila sa gibuksan nga ward niadtong unang semana sa Agosto.
Matod ni Dr. Miyaki nga misaka ang ilang admission ug 240% apan ilabina ang out-patient nga moabot ug 300%.
Gawas sa CDH, zero-billing na sab ang Kapalong District Hospital, IGACOS District Hospital, Regional Medical Center sa Apokon, Tagum ug SPMC sa Davao City.
