HATAGAN ug libreng pag-eskuyla ang mga “mogradwar” sa Bahay Pag-asa (BAP), ang pinuy-anan sa mga menor-de-edad nga nakahimo ug salaod (Children In Conflict with the Law [CICL]).
Kini ang gipahayag ni Gobernador Edwin I. Jubahib (Kuya Gob) atol sa ikalimang anibersaryo sa pagkatukod sa BPA, Byernes, Agosto 30 nga nag-isip kanila nga mga “biktima” usab bisan pa kung nakalapas sa balaod.
“Mga igsoon ko kining Bahay Pag-asa mao ning giingon nga Home of Hope. Sayod kita nga ang tanang kabataan nga dire sulod sa compound sa Bahay Pag-asa kini sila dili lang ang naka-biktima kundili usab mga biktima. Biktima sa kapabayaan, unang-una sa ginikanan. Ikaduha, sa sobrang pagpalangga sa ginikanan o biktima sa kalisod; biktima sa kalisdanan. Tungod sa kakulangon sa pag-eskuyla, guidance, it results gihapon nga makahimo ug di-maayo,” matod ni Kuya Gob nga naghatag ug dignidad sa mga residente nga gipaningkamotan i-reporma sulod sa BPA.
Gipanghinaut ni Kuya Gob nga unta ang maayong mga pagtulon-an nga nakat-onan sa mga residente ipadapat sa kaugalingon ilabina unya sa ilang pag-gradwar o paggawas gikan sa BPA.
“Dinhi sa Bahay Pag-asa ang tanan gitudlo dire values, religious teachings, ato ning gisuportahan. Ato pang gipaningkamotan nga mas doble pa nga pag-reform sa atong mga kabataan. Hinaut nga ang tanang maayong gitudlo dire unta inyo kining madala sa inyong paggawas. Dili pa ulahi ang tanan,” panghinaut ni Kuya Gob nga nagdasig sa residenteng kabataan nga magkugi, magbinuotan susama sa iyang gihimo nga kinahanglan pa gani mag-working student ug magbuhat ug maayo bisan pa sa kalisod.
Ug alang sa “graduate” sa BAP mahimong hayag pa unya ang ilang kaugmaon.
“Alang sa mga bata nga mo-graduate, manarbaho mo’g maayo ug moeskwela mo. Duol mo sa akoa sa opisina kay hatagan mo nako ug scholarship program. Basta dili na magbugoy-bugoy. Sabot ha? Tanang graduate dire priority mo sa scholarship program, high school ug college,” pasalig ni Kuya Gob nga gikalipay ug dako dili lamang sa mga residente lakip na sa ilang mga ginikanan nga mitambong.
Atol sa ikalimang anibersaryo gipahibalo ni Provincial Social Welfare Development Office department head Rosalinda Rapista nga daghan na ang nahimong NC-II accredited nga mga residente lakip na ang bag-ohay lang nga onse (11) NC-I SMAW (Shielded Metal Arc Welding) pinaagi sa TESDA gawas pa gi-accredit sa Alternative Learning System (ALS) aron maka-eskwela sa taas nga grado.
Kahinumduman nga sa tumong nga mapalig-on pa ang mga serbisyo-sosyal sa probinsya, gibisita ni Gobernador Edwin Jubahib (Kuya Gob) ang Bahay Pag-asa ug silingang Women Development Center niadtong Agosto 7, 2019 ug diha-diha gihataga’g solusyon ang pangunang problema sa tubig lakip na ang baho, naghuot nga kanal nga gikalipay pag-ayo sa mga staff ug residente.
