BISAN kung lain-lain ang ilang gidapigan sa milabay’ng 2019 nga eleksyon, nahimong nagkahiusa ang tanang barangay opisyales pinaagi sa Sporfest 2019 sa Liga ng mga Barangay sa Davao del Norte nga gibuksan Byernes, Agosto 23.
“Luyo sa atong dakong kadaugan, dili ikalimod nga ang miaging eleksiyon miresulta sa pagbahinbahin sa atong barangay officials. Mao nga mapasalamaton ako nga inyong gipahigayon kini nga Sportsfest. . Sports is a favorable venue for healing and reconciliation. So, I hope that you make the most of this opportunity to settle differences and strengthen unity and camaraderie for the common good,” matod sa mensahe ni Kuya Gob Edwin I. Jubahib nga gihatod pinaagi ni Mr. Arnold Alcaraz.
Nagdasig sab si Bise Gobernador Rey T. Uy nga presente gayod sa pagbukas sa maong torneyo nga kalimtan na ang tanan alang sa kalamboan sa probinsya.
“Human na man ang eleksyon, One DavNor, One Team na ta ron. Wala na ‘tong nangagi, kalimti na. We should move forward for better Davao del Norte,” pagdasig ni Bise Gobernador Uy nga positibong gidawat sa mga barangay opisyales.
Ang pagkalimot sa miaging pagkabahin-bahin importante aron motunhay ang panaghiusa nga gisinggit sa administrasyon ni Kuya Gob alang sa tumong nga kalamboan.
“Importante kaayo kini kay ang atong singgit karon mao ang “One Team, One DavNor,” diin atong hugot nga giduso ang panaghiusa sa tanang mga opisyales ug hut-ong sa katawhan. Gikinahanglan nato ang suporta sa atong kabarangayan, ilabi na sa pagsulong sa atong development agenda,” nagpadayon ang mensahe nga nagpasiugda sa “KUYA GOB” development agenda nga nagkahulugan ug Knowledge management, education and sports; Universal Health and social services; Yield growth, sustainable agriculture and environment; Adequate infrastructure and faciltiies; Greater livelihood and income opportunities; Operational peace and development framework; ug Broad-based economic growth and investments.
Atol sa sportsfest gitaho sab ni bise-gob Uy nga sulod sa 15 ka adlaw nahuman na niya ug tan-aw ang mga karsada sa Distrito I ug 2 nga kinahanglang ayohon ug kadtong angay’ng abrihan. Dugang niyang gidasig nga “pinaspasay gyod” samtang anaa pa si Presidente Rodrigo Duterte, Senador Bong Go ug Bato de la Rosa sa ilang mga posisyon.
Nanghinaut si Kuya Gob nga magmalumposon ang Sportsfest sa Liga ng mga Barangay dili lamang alang sa paugnat sa kusog hinuon nga moresulta kini ug mas himsog, mas madasigon ug mas produktibo nga barangay opisyales.
Nagpadala sab ug mensahe ang Opisina ni Congressman Pantaleon D. Alvarez nga nagdasig sa tanang barangay opisyales alang sa panaghiusa.
