Gipili sa mga miyembro sa Davao Integrated Development Program (DIDP) isip bag-ong Chairman si Kuya Gob Governor Edwin I. Jubahib, sa gipahitabong Board Meeting niini kagahapon sa Kapitolyo sa Davao de Oro.

Napili sab nga pagka Vice Chairman si Davao de Oro Gov. Jayvee Tyron Uy, samtang nahimong Executive Director sa DIDP si DavNor Provincial Administrator Engr. Josie Jean R. Rabanoz.

Nahisgutan sa maong meeting ang pagpalig-on sa mga programa alang food security, potable water, wildlife conservation, solid waste management, flood control ug uban pa. Apil sa highlights sa meeting ang pagtapos sa SMART Seas Project karong tuiga, ug ang bag-ong proyekto sa Plastic Smartcities pinaagi sa tabang sa World Wildlife Fund (WWF). Tumong dinhi sa DIDP ang pagdasig sa mga miyembro niini nga LGUs aron sa pagtakda og klaro ug kaya kab-oton nga katuyuan sa pagkunhod sa polusyon sa plastic sa Davao Region.

Ang DIDP gimugna sa mga LGUs sa Rehiyon XI sa tuig 1994, aron hiusahon ang mga plano, programa ug inisyatibo nga pangkalamboan sa mga LGUs, uban ang mga programa sa nasyonal nga panggamhanan sa rehiyon.

Miyembro niini ang mga dakbayan sa Davao, Tagum, Panabo, Digos ug Samal, ug ang mga probinsya sa Davao Oriental, Davao de Oro, Davao del Norte, Davao del Sur ug Davao Occidental.

Mokabat na ngadto sa dul-an P700 milyones ang pondo nga gihatag sa national government alang sa implementasyon sa farm to market road projects, small irrigation development projects, ug daghang mga livelihood and resource management projects.