GIPAABOT ni Kuya Gob Edwin I. Jubahib ang iyang hugtanong suporta ngadto sa mga tig-atiman nga Social Workers ug ang ilang gi-atiman nga mga Persons With Disabilities (PWDs) atol sa panangtapok sa mga SWs agi’g pagtimaan sa probinsya sa ika-41 nga National Disability Prevention & Rehabilitation, Hulyo 18.

“Bilang bagong governor dito sa Davao del Norte, Kuya ng masa, Kuya Edwin Jubahib, pagsikapan ko po na ang pangangailangan ng ating social workers ay ating matugon. . makipag-dialogue ko sa inyoha para inyong ma-open up kung unsa man ang inyohang mga basic needs nga gusto ninyo nga masuportaran nako dinhi sa atong probinsya. Dili ko gusto sa akoang system of governance nga may mga taong nag-volunteer na laging nag-volunteer. Alam ko po lahat tayo may mga pangangailangan. Mao na akoang gusto kung unsaon pagtabang sa inyoha nga mahatagan ug benefits, especially sa mga volunteer social worker,” pahayag ni Kuya Gob atubangan sa mga Social Workers didto sa Davao del Norte gym.

Dugang gipahayag sa gobernador ang iyang gusto nga ang programa sa national DSWD adunay panaghiusa ngadto sa lokal aron mahatod ang sakto ug tamang serbisyo nga gikinahanglan sa katawhan.

“Gusto nako nga dili masayang ang pondo sa gobyerno. Gusto ko nga ang pondo ay talagang makarating sa mga nangangailangan,” dugang pahayag ni Kuya Gob nga mao kini ang bug-at nga rason nganong iyang gidawat ang hagit nga modagan pagka-gobernador bisan wala siya makaagi pagka barangay opisyal.

Kahinumduman nga balik niadtong Hulyo 1, ang pinaka-unang adlaw sa iyang serbisyo, gideklarar dayon ni Kuya Gob nga libre na ang tanang serbisyo ug tambal alang sa mga taga Davao del Norte diha sa tulo ka mga hospital sa probinsya sa Kapalong, Carmen ug IGACIOS lakip ang DRMC diha sa Tagum City ug SPMC sa Davao City. Iya sab gipahibalo nga iya na sab gilibre ang tanan nga mo-avail sa Davao del Norte blood bank ug paus-osan ang processing fee.

Atol sab sa pagtapos sa National Disability Prevention and Rehabilitation Provincial Celebration gipaabot ni Kuya Gob ang iyang hugtanong suporta sa sektor sa mga PWD pinaagi ni Provincial Social Welfare Development Office department head Rosalinda Rapista.

“Gi-text ko ni Gov: ipaabot ang akoang mainitong suporta sa atong mga PWDs since dunay seminar. Kini nga sektor importante kaayo nga diin ato ni siyang tabangan gayod. Duna na kita’y mga initiatives nga atong nabuhat sa miaging tuig then ato pa kining palig-onon. . Duna na kita’y tukoran pa kanang gitawag nga Sheltered Workshop facility diin diha na nato i-conduct ang atong mga trainings. Ang inyong mga kahanas, kahibalo dapat i-improve nga makadugang sa panginabuhian bisan ing-ani ta. Dili ni siya hadlang sa atoang success, improvement in life. Being public servants together with elected officials, maningkamot kami nga ihatag unsa kadtong dapat ihatag gyod sa inyoha,” matod sa mensahe nga gipaabot pinaagi ni Ms. Rapista.     

Sa pagtimaan sa NDPR week, klase-klaseng medical, dental, hearing tests, libreng medisina ug mga padula alang sa kalingawan sa mga PWDs didto sa Citi Mall, Tagum City nga gitambongan gayod ni Committee chair on Health Board Member Dr. Daniel Lu.

DavNor News