Davao del Norte – Gidayeg sa mga kadagkoan sa nasyonal nga depensa ang lokal nga inisyatibo alang sa kalinaw sa probinsyal nga panggamhanan aron matapos na ang komunistang rebelyon dinhi sa Davao del Norte.
Matod ni Presidential Peace Adviser Carlito Galvez, Jr. nga todo-suporta ang iyang ihatag sa gihimong lokal nga gambalay sa pagsabot-sabot para sa kalinaw (Local Peace Engagement Framework).
“We are happy. I would like to thank Gov. Edwin Jubahib for the initiative and OPAPP will throw more than a hundred percent support to his (peace efforts), (Kami nalipay. Buot nakong pasalamatan si Gov Edwin Jubahib ug akong ihatag ang sobra gatos porciento nga suporta sa iyang inisyatibo ug ang OPAPP sa ilang paningkamot alang sa kalinaw) Galvez said.
Base sa Executive Order No. 70 ni Presidente Rodrigo Duterte, gipirmahan ni Gobernador Edwin Jubahib ang iyang Executive Order No. 2 Lunes, Hulyo 15 nga nagmugna sa Task Force Davao del Norte aron taposon ang lokal nga kasamok tali sa mga komunista dinhi sa probinsya.
Ang maong dokumento nagsagop sa nasodnong gambalay alang sa kalinaw pinasukad sa tibuok-nasod nga pamaagi aron makab-ot ang dumalayong kalinaw.
Gipahayag sab ni Secretary of National Defense Delfin Lorenzana ang iyang kusganong suporta sa maong talagsaong paningkamot nga nag-ila sa dakong papel sa probinsyal nga panggamhanan aron matapos na ang panag-away dinhi sa probinsya.
Ang tigpamaba sa Eastern Mindanao Command (Eastmincom) nga si Lt. Col. Jake Obligado dugang nagtug-an nga aprobado gayod kang Secretary Eduardo Año sa Department of Interior and Local Government (DILG) ang lokal nga gambalay alang sa panagsabot sa kalinaw human nga gipresentar ni Gobernador Jubahib ang mga dokumento sa wala pa moabot ang presidente dinhi sa Tagum City Martes sa gabii.
Sa pag-anhi ni Presidente Duterte, iyang gitunol ang sobra 300 ka mga balay ngadto sa mga kanhing rebeldeng New People’s Army (NPA) nga gitawag ug Freedom Residences.
Gitug-an sa maong opisyal sa kasundalohan nga buot ipalapad sa DILG Secretary ang inisyatibong gihimo sa Davao del Norte labot sa kalinaw aron masundog sa ubang rehiyon ug mga probinsya sa tibuok nasod.
Sayo-sayo pa, gipresentar ni Kuya Gob Edwin Jubahib kauban si 10th ID Commander MGen. Jose Faustino, ang 34 ka mga kanhi rebelde ngadto kang Lorenzana ug Galvez didto sa Kapitolyo.
Ang maong hitabo gisaksihan ni Davao del Norte 1st District Congressman Pantaleon Alvarez, Davao de Oro 2nd District Congressman Ruwel Peter Gonzaga.
Desidido sab ang maong mga opisyales nga ihatod ang gikinahanglang serbisyo alang sa panglawas, panginabuhian, edukasyon ug pabalay aron makasugod ang kanhi mga rebelde sa ilang bag-ong kinabuhi.
“Amo kamong hatagan sa tinud-anay nga suporta para magpuyo mo nga malinawon kuyog ang katawhan sa probinsya sa Davao del Norte,” matod ni Gobernador Jubahib.
