DELIKADO, problema nga gitigom sulod sa usa ka tuig nga gihataga’g solusyon sa usa lang ka tawag.

Gawas sa sobrang admittance sa mga pasyente, problema sa Island Garden City of Samal (IGACOS) District Hospital ang mga makahilo ug delikado nga mga biya (toxic, hazardous wastes) nga nakatambak sulod na sa usa ka tuig.

“Didto ko sa IGACOS. Pag-abot nako didto mga 40 ka pasyente naa sa alley o 50. Naay mga 11 ka buok nga naka-dextrose naglingkod kay wa na’y folding bed. Nanghubag ang mata kay walay tulog. Ingon ko ni Doktor, Dok ngano man ni? Mao tong nagpapalit ta’g 16 ka buok, akong gipagamit na pod didto. Unya ang iyang gisulti nga kulang lagi ta ug kwarto. Ingon ko unsa man nang second floor sa bilding? Ingon siya puyde man unta magamit sir pero wa man mi basurahan sa hazardous waste. Didto gitambak tanan. Gisulod ug plastic drum unya gi-sealed. .. Isa ka tuig na na sir. . Buang gyod ni nga pamaagi. Naay bilding gigastohan ug dako, pila ka milyon, gihimong basurahan? Ingon siya, naa man gud rules sa EMB sir nga dili puyde magpataka lang mi’g butang ana kay toxic na siya, bawal. Unya naa pod daw rules ang pag-collect sa maong garbage. Unya ang transporter wala mag-renew, so isa ka tuig ron nga nakaistambay halos mapuno na ang second floor,” tug-an ni Gobernador Edwin I. Jubahib ngadto sa mga empleyado atol sa convocation program.

Dihadihang gi-aksyonan ang usa ka tuig na nga suliran.

“Akong gitawagan pati si Direktor Ruth Tawantawan sa DENR. Nganong miaksyon man agad. Ingon siya sir karong gabii padulong na diha ang mokolekta sa maong garbage. Tan-awa, isa ka tuig nga nag-antos puyde ra man himoon ug isa ka oras nga tawag. Kana tungod sa walay pag-atiman, tungod sa kapabayaan. Mao nang resulta nga ang katawhan mobati ug kasuko nato nga mga public servant,” kusganong pamahayag ni Kuya Gob Edwin uban ang pagpangutana sa mga empleyado kung pila ka porciento ang ilang mahatag alang sa tinud-anay nga serbisyo.

Wala pa nahuman, gitug-an sab ni Kuya Gob ang iyang nadiskubrehan sa Provincial Disaster Risk Reduction (PDRRM) bilding.

“Sa akong pagbisita sa PDRR, dako kaayo ang generator, ang problema walay koneksyon, gi-display. Pila na ka tuig to? Giingnan nako unsa ma’y gamit ana? Sir wa gyod na’y powerhouse. Gipalit na para mo-received ta’g KALASAG award. Pastilan! Mi-purchase ta’g equipment para gamiton, nga ato lang i-display para mo-received ta’g award. Ang purpose bisan wa ta’y award basta ang atoang trabaho, ang pag-serve sa katawhan maoy pinaka-importante, dili ang atong pangalan. That is the true meaning of public service. Di ta  angay manghambog. Kay ngano man? Sweldado ta. Ang angay natong ipanghambog nga ma-feel ang serbisyo sa katawhan sa Davao del Norte,” pagtug-an sa gobernador.

“Kanatong mga department heads dinhi sa Kapitolyo usbon nako: Hangyoon mo nako nga kung gusto mo mouban sa akoang pagserbisyo sa Davao del Norte gikinahanglan nako ang inyong koordinasyon. Kinahanglan nakahibalo na mo unsa ang akong direction. Simple lang gyod. Kinahanglang tinud-anay nga serbisyo. Ang eleksyon, ang politika kalimtan nato, human na. Bisa’g kahibalo ko wa mo mosuporta sa akoa. Seguro normal na kay lain man inyong amo niadtong panahona. Pero karong panahona. . . gusto nako ang inyong loyalty. Mahatag ba ninyo? Pila ka porciento?” pangutana sa gobernador nga gitubag ug 100 percent.

Una nagtapos sa convocation program, subling gipasiugda ni Gobernador Edwin ang tinuod nga serbisyo publiko.

“Ikatulo, gikinahanglan nako sa kada usa ninyo ang the true meaning being a public servant. Kinahanglan ibutang nato sa atong hunahuna nga dili kita ang amo sa katawhan, dili kita ang angay serbisyohan sa masa, kundili kita ang angayan ang moabot, mohatag ug tinud-anay’ng serbisyo sa katawhan sa Davao del Norte. Daghang Salamat. God bless us all, ang kabag-ohan sa Davao del Norte alang sa tinud-anay nga kalamboan.”