GAWAS sa pagtabang nga maandam ang mga classrooms alang sa pagbukas sa klase karong Hunyo 3, andam sab nga atimanon sa Youth for Environment Schools-Organizations (YES-O) ang gitanom nga mga kahoy atol sa pagbukas sa Brigada Eskwela 2019 didto sa Limbaan National High School, New Corella.
Sobra usa ka gatos nga mga seedlings sa lain-laing klase sa kahoy gikan sa Davao del Norte Provincial Environment Natural Resource Office (PENRO) ang gitanom sa mga miembro sa YES-O daplin sa Limbaan River Lunes, Mayo 20.
“Among role sa DepEd is to invest education. . So with the inculcation of education nga mahibal-an sa kabataan ang importance sa pagtanom ug kahoy, we can ensure nga in the future modako gyod nang (gitanom) kahoy,” matod ni Davao del Norte Division YES-O coordinator Reynald Ocay nga nagbutyag sab sa ilang programa labot sa pagtanom ug mga “native” trees nga gitawag ug “Endemic Tree Planting.”
Gidugang sa DavNor Division YES-O coordinator nga aron gyod maseguro nga mabuhi, tulo ka tawo ang puli-puli nga mag-atiman sa gitanom nga seedling.
Among gi-promote nga program is three-for-a-tree planting activity; meaning ang isa ka kahoy tulo ka tao ang mag-alaga ana. Kung mahimo isa ka community leader or adult leader or YES-O adviser or teacher ug duha ka bata. . .Ang kada eskuylahan magtanom gyod ug endemic tree unya tulo ka tao sa isa ka kahoy. . So every now and then kadtong tulo magbalik-balik, kinsa tong nagtanom maoy moatiman sa kahoy. So we are assured nga mabuhi gyod kay naa ma’y moatiman dili kay “Live and Let Die,” padayong pasabot sa DavNor Division YES-O coordinator.
Aron gyod mabuhi ang gitanom, padayon sab nga gibisita ug gitudloan sa DavNor PENRO ang komunidad ilabina ang mga miembro sa YES-O sa pag-atiman sa kahoy.
“Usa na sa commitment sa atoang opisina nga bisitahon gyod pirme ang project. Usa pa, ang forest trees dili kaayo vulnerable sa sakit unlike sa mga fruit trees. Ang kalaban lang gyod ani kanang mga stray animals ug kanang pataka ug hagbas. So ang role sa atong tigbantay dire mao tong tigpamadlong. . Kinahanglan gyod nga matudloan sa basic nga pag-amoma parehas anang round weeding. . kay ang seedling man gud six months onward kaya na niyang mag-survive. So crucial kaayo ang first three months ug ang second three months,” pahayag ni DavNor PENRO department head Romulo Tagalo.
Gawas sa mga pagbansay, gipasiugda sab sa DavNor PENRO ang food-for-work aron gyod maseguro nga mabuhi ang gitanom nga mga kahoy.
“Kadtong mabilin dinhi ato nang himoon nga “food-for-work.” Proven na nga epektibo ug maoy hinungdan nga nangabuhi gyod ang mga seedlings nga gipangtanom sa PENRO. . Ang target sa PENRO at least two hectares every year ug na-attain nato na tungod sa suporta sa Provincial Government, naa man pirme,” dugang pahayag ni Tagalo..
Gawas sa mga seedlings, gi“buy back” sab sa DavNor PENRO ang isa ka kilo recyclable plastics baylo sa isa ka “tumbler.”
