PORMAL nga gibuksan sa Davao del Norte Schools Division ang Brigada Eskwela 2019 didto sa Limbaan National High School, New Corella Lunes, Mayo 20.
Ang Brigada Eskwela maoy tinuig nga inisyatibo sa Department of Education aron andamon ang tanang eskuylahan sa tibuok nasod sa pagsugod sa klase ilabina sa publikong tunghaan nga karong tuiga magsugod Hunyo 13.
Matod ni Davao del Norte Division Schools Superintendent (SDS) Dr. Josephine Fadul nga sa pagkakaron gitawag kini nga Brigada Eskwela Plus sanglit daghan pa ang panginahanglan sa eskwelahan gawas sa panglimpyo ug repair alang sa tibuok tuig. Ang mga estudyante angay sab matudloan lakip na niini ang pagkahimong andam panahon sa kalamidad ug bisan ang pag-atiman sa kalikopan sa eskwelahan.
“Dili lang siya gitawag nga Brigada Eskwela kundili Brigada Eskwela Plus, kay unlike in the past nga ang atong Brigada buhaton lang few weeks before the opening of the class pero karon year round na gyod siya, kay ang panginahanglan ng eskwelahan year round man gud. Dugangan pa gyod siya ug disaster preparedness; pasok ang DRRM, ang YES-O about ecology,” matod ni DavNor SDS Dr. Josephine Fadul.
Dugang ni DavNor SDS Fadul nga ang bolunterismo ilang gi-awhag ug gisilsil diha sa mga batang estudyante.
“The essence of volunteerism is present. Hasta ang mga bata molihok na pod kay among gi-revive. Adtong una wa ma’y mga janitor, wa may utility men di ba? Ulaw kaayo tan-awon nga ang mga ginikanan nang-guna unya ang mga bata nag-akin-akin lang diha sa daplin. Ang mga bata dapat mangapil pod kay ilaha man ning eskwelahan. . so tinabangay gyod, tinabangay,” pagpasiugda sa DavNor SDS.
Sanglit mohangtod pa Sabado, Mayo 25 ang Brigada Eskwela, nanawagan ang hepe sa DavNor division alang sa dugang boluntaryo.
“Please, isa ka semana atong Brigada Eskwela. Akong gi-awhag kadtong wala pa kaadto sa eskuylahan, tabang ta kay ang bawat tabang nga atong gihatag during the Brigada Eskwela week is padulong gyod ni sa atong mga kabataan nga nang-eskwela. June 3 is the opening. Dili na pareha sa una nga kita pa nga nangeskwela inigsugod sa klase nanglimpyo pa ta, nang-guna, namukpok, nanglampaso. Karon pag June 3 klase, klase na gyod na, nagtudlo na gyod si titser. Hopefully nagpaabot pa mi sa inyoha sa daghan pa nato nga mga stakeholders hangtod Byernes kay sa akong gi-ingon year round na siya. Sa mga naay malumo nga kasingkasing andam ug tagana gyod ming modawat sa inyohang mga hinabang whether in form of human resource or financial assistance or material nga mga butang. . Adto lang mo sa pinakaduol ninyo nga eskuylahan,” panawagan ni SDS Fadul.
Gilaoman na sa DavNor DepEd division nga motaas pa ang gidaghanon sa motungha kumpara sa 2018 school year.
