MILIHOK dayon ang probinsyal nga administrasyon ni Gobernador Anthony del Rosario (AGR) pinaagi sa Provincial Agriculture Office (PAGRO) aron mamenosan ang epekto dala sa hulaw sa 2019 El Niño phenomenon nga nagpaubos sa produksyon sa umahan.
Ingong usa ka agrikultural nga probinsya, gipakusgan ni Gob AGR ang pagpanguma pinaagi sa BEST PEOPLE development agenda diha sa letrang “E”-Enhanced Agri-Aquaculture nga mga programa.
Sa Kapihan sa Kapitolyo nga programa gahapon, Huwebes Abril 25, gibutyag ni Davao del Norte PAGRO Assistant Provincial Department Head Engr. Daryll Ayado nga base sa report nga ilang nadawat labot sa abot sa humay duna gyod kini pag-us-os.
“Kaniadto duna ta’y one hundred cavans matag ektarya, karon sa report nakuha nato 45% nga na-harvest na, naa na lamang siya sa 93. Duna gyo’y reduction,” matod ni Engr. Ayado nga bisan ug dili pa kompleto ang report apan namatikdan gayod ang pag-ubos.
Aron matabangan ang mga apektadong mag-uuma, sukad niadtong Pebrero 2018, nagpahulam na ang probinsyal nga panggamhanan ug mga mobile water pumps sa lain-laing kooperatiba sa mag-uuma lakip na ang mga tigbuhi ug isda sa inland fishpond.
“Sa pagkakaron duna ta’y istambay nga 17 ka water pumps, mobile na nga anytime ang atong mag-uuma sa humay duna’y na-eksperyensya nga kakulangan sa suplay sa tubig, pwede na nilang hulaman. . . na-distribute na siya sa New Corella: Lower Limbaan, Carcor, naa pod ta’y gihatag sa Kamuning. Naa po’y indibiduwal mihulam dili lang rice farmers, naa ta’y tilapia grower sa Dujali, nanghiram pod na siya. Nagbutang gyod ta’g standby pumps engkaso ug dunay kadaot sa irrigation system,” padayong pagbutyag ni Engr. Ayado sa paningkamot sa probinsya.
Gawas sa mechanical mobile water pumps, nakasungkit sab ang DavNor PAGRO ug pondo ug gisugdan na paghimo ang mga solar-powered irrigation systems.
“Duna pod kita’y mga proyekto para sa irigasyon—solar-powered irrigation system. Naay karon upat nga gihimo para sa atong mga farm association. Ang usa ka unit nagkantidad ug sayis milyones. Dunay sa New Corella, Pagsabangan, sa Semong ug sa New Alegria. Kining solar-powered pump gwapo ni siya kay di na nagkinahanglan ug krudo, koryente. Maka-irigar ni sya ug napulo ka ektarya sa usa ka adlaw, makatabang gyod siya,” dugang sa PAGRO assistant department head.
Gawas sa mekanikal nga ayuda, gipadayon sab sa administrasyon ni Gob AGR ang pagtabang sa mga mag-uuma pinaagi sa pagbayad ug 50% sa crop insurance diha sa Philippine Crop Insurance Corporation (PCIC) aron dunay madawat pananglit madaot ang panguma gumikan sa hulaw, baha ug uban pang kalamidad.
