GIPAILAWOM na sab sa Davao del Norte Department of Interior and Local Government (DILG) provincial office ang tanang mga City ug Municipal Local Government Operation Officers (LGOOs) apil ang mga focal persons alang sa usa ka adlaw nga orientation labot sa Seal of Good Local Governance (SGLG), Abril 11.
Ilawom sa administrasyon ni Gobernador Anthony del Rosario, nadeklara ang probinsyal nga panggamhanan ingong SGLG awardee. Ang SGLG maoy “sukdanan” sa mga local government units (probinsya, syudad ug munisipyo) giunsa nila pagdumala ang ilang lokal nga panggamhanan sa pagtubag ug pagtagana sa mga serbisyo ngadto sa publiko diha sa pito ka assessment areas: Financial Administration, Disaster Preparedness, Social Protection, Peace and Order, Business Friendliness and Competitiveness, Environment Management ug Tourism, Culture & the Arts.
“Hinaut unta mag-take advantage ta ning adlawa ug mangayo ko’g pasensya kay kuliton jud mo namo kay gusto namo pasar tanan. Last year pasado ang province. . pero naa ma’y condition nga 10% sa imong component LGUs, at least duha,” pagklaro ni DILG provincial director Abeto Bernasor sa mga LGOOs gikan sa tulo ka component nga syudad ug walo ka munisipyo sa probinsya.
Sanglit gikinahanglan dunay mopasar nga 10% sa iyang sakop nga mga component LGUs, wala makadawat ug “marker” ang probinsyal nga panggamhanan kay bugtong ang DavNor lang ang mipasar sa assessment.
“Ayaw mo pagsalig sa provincial office. . Kun SGLG passer ta, dako kaayong garbo, naa ka’y marker. Asa pa ka mapildi ana sa eleksyon. Bisag magdagan ka’g ika-4th team di jud ka mapildi kay di naman ka pwede makadagan. . . Dunay investment ang gobyerno. There is no other way to check the performance of the LGU but thru the seal of good local governance. . matino, mahusay at maasahan. . transparency, capability, capacity. Ug pinaagi sa inyoha, we’ll elevate as vital and important instrument para sa inyong tagsa-tagsa ka LGU. Take that as a responsibility isip civil servants,” dugang pagklaro ni PD Bernasor uban ang pasiaw.
Pananglit madeklara nga SGLG awardee, ang probinsya makadawat ug P7M, P5M alang sa syudad ug P3M alang sa munisipyo pinaagi sa gitawag ug Performance Challenge Fund (PCF).
Nadeklara na nga SGLG awardee ang probinsyal nga panggamhanan sa DavNor ug ang “DavNor Pavillion bilding” sulod sa DavNor Sports Complex maoy nagbarog nga timaan sa iyang maayong pagdumala.
“Hopefully pagbalik nato puhon, kamong mga focal person duola inyong mayor, Mayor kinahanglan gyod tang magpatawag ani, mameligro daghang mawala sa atoa kung di ta maningkamot,” pagdasig DILG probinsyal director.
