PADAYON NGA GIPANAWAGAN ni Davao del Norte Gobernador Anthony del Rosario (AGR) ang pagkahimong “responsableng pagka-ginikanan” (responsible parenthood) atol sa pagbukas sa Festival of Services (FoS) nga gihatod didto sa Apokon, Tagum City, Lunes, Enero 21.
Uban sa pagpahibalo nga tumong sa iyang administrasyon nga makahuman ang tanan ug kolehiyo, unang gidasig sa gobernador ang mga kabataan nga maningkamot hangtod makahuman ug college sanglit gilibre na kini ni Presidente Rodrigo Duterte.
“Naa lang ko’y gamay nga mensahe: Sa mga bata importante nga makahuman mo sa grade school kay pagka human sa grade school mag-high school pa mo, pagka human mag-college. Libre na karon ang college kay gi-libre na ni Presidente Digong. . importante gyod na kay gusto namo sa probinsya, kabatan-onan sa Davao del Norte makahuman ug college para makapangita ug trabaho nga pwede pod magnegosyo,” pagdasig ni Gob AGR.
Apan iyang gisubli ang iyang panawagan sa milabay’ng Festival of Services labot sa pagkahimong responsableng pagka-ginikanan.
“Sa mga ginikanan ang hangyo namo: Number one, tabangan ninyo ang inyong mga anak para makahuman ug eskuyla. Ikaduha, mag-practice ta ug responsible parenthood. Ayaw pasobra sa anak. Kung pila lang na kaya ninyo mao lang na inyong buhaton. So dapat ang magtiayon, inyoha gyod nang sabotan pila gyod dapat ang inyohang anak. Kung ang inyong kwarta igo lang sa duha ka anak, dapat duha ka anak lang. Ayaw pasobra. Kung ang kwarta ninyo para lang sa duha unya moabot ug napulo ang inyong anak, segurado bisa’g usa wala’y makahuman,” pagpalanog sa panawagan sa gobernador.
Ingong secretary-general sa Hugpong ng Pagbabago (HnP) nga gimugna ni Davao City Mayor Sarah Duterte, gipasibaw sab ni AGR ang gi-mithi sa bag-ong natukod nga partido.
“Gani importante na, usa na sa atong giduso sa Hugpong ng Pagbabago. Gusto gyod nato nga kitang tanan mas gwapo ang atong kaugmaon, kaugmaon sa atong mga anak importante gyod nga dili na ta magpasobra sa bata kay basin silang tanan dili makahuman ug eskwela. Dili baya lalim pod magpadako ug bata. Kung ang kwarta ninyo daghan, walay problema, ang importante sila makahuman gyod ug eskwela para maka-trabaho sila. Mao na ang among mensahe,” pagpasibaw sa gobernador sa gustong mahitabo sa HnP dili lamang sa tibuok rehiyon onse kundili alang sa tibuok Pilipinas.
Atol sa FoS sa Apokon, nakadawat ang tanang mga estudyante ug school bag nga adunay sulod mga school supplies samtang ang mga ginikanan nakadawat sab ug groserya gikan kang Gob AGR.
Ang Festival of Services sa Apokon sa halos 80 ka mga serbisyo mapahimuslan lamang sa duha ka adlaw sanglit niadtong Disyembre 3-7, 2018 gihatod na kini didto sa Visayan Village.
